Gjithë mallrat serb të bllokur do të vërshojnë në gjithë tregun vendor dhe kjo pas marrjes së vendimit nga Qeveria e Kosovës.
Sipas vendimit të marrë këtë të martë, është vendosur që të mos zbatohet masa prej 100% taksë për mallrat e futur në doganë para datë 21 nëntor, datë edhe kur është bërë e qartë masa e parë.
Sipas zëdhënësit të Doganës së Kosovës, Adriatik Stavileci, malli ka për t’ju nënshtruar tatimit mbi vlerën e shtuar dhe kjo gjë sigurisht që është mirëpritur nga përfaqësuesit e bizneseve.
Ndërsa Kryetari i Odës Amerikane në Kosovë, Arian Zeka, ka thënë se mallrat e bizneseve kishin mbetur të bllokuara, pasi qeveria nuk kishte dhënë afat për doganim dhe tërheqjen e tyre nga depot. Zeka ka kërkuar që bizneset që kanë paguar masën gjatë kësaj periudhe dhe kanë nxjerrë produktet nga depot, t’u kompensohen paratë. Mirëpo, në doganë kanë treguar se asnjë biznes nuk e kishte tërhequr mallin nga stoqet. 80 përqind e stoqeve janë me mallra ushqimore.
Në vendosjen e parë të masës, pra të taksimit 100%, dogana kishte pezualluar pranimin e mallrave në depo nga Serbia dhe Bosnje Herzekovina, ku përjashtim bënin vetëm dy brende ndërkombëtare.
Vendimi kishte nxitur debate në seancën paralamentare të javës së shkuar dhe disa ministra kishin kërkuar me ngulm një raport të detajuar nga Ministria e Financave.
