Agjencia amerikane Bloomberg i ka kushtuar vëmendje të veçantë zhvillimeve të fundit në Shqipëri, duke u fokusuar në aksionin për prishjen e ndërtimeve pa leje në vend.
Në artikull, Bloomberg thekson se Kryeministri Edi Rama po vijon me vendosmëri planin e tij për të shembur rreth gjysmë milioni objekte të paligjshme.
Përveç heqjes së ndërtimeve, agjencia përmend edhe projektet për lirimin e hapësirave publike, duke përfshirë qytetin bregdetar të Vlorës dhe prishjen e rreth 100 ndërtesave në fshatin alpin të Thethit në veri të vendit.
Sipas Bloomberg, në gjithë Shqipërinë me rreth 2.4 milionë banorë janë angazhuar tetë ekipe arkitektësh, të shpërndara nëpër rajone të ndryshme për të monitoruar situatën.
Në artikull nuk mungojnë as kritikat nga kundërshtarët politikë të Ramës, të cilët e kanë sulmuar ashpër për prishjet në Theth, akuza që kryeministri e mohon me forcë. Bloomberg thekson se zemërimi ndaj këtij aksioni është më i dukshëm në zonat veriore, ku mbështetja për Ramën është më e ulët në krahasim me rivalin e tij politik, ish-kryeministrin Sali Berisha.
Artikulli i Bloomberg
Kryeministri shqiptar Edi Rama po vazhdon me planet e debatueshme për të shembur gati gjysmë milioni ndërtime pa leje në të gjithë vendin, pavarësisht zemërimit në rritje të banorëve vendas, të cilët e akuzojnë për sabotim të industrisë së lulëzuar të turizmit.
Skuadrat e prishjes po pastrojnë kioskat, zgjatimet në trotuar dhe ambientet e jashtme të kafeneve në kryeqytetin Tiranë. Në qytetin bregdetar mesdhetar të Vlorës, po hiqen kasolle druri dhe bare plazhi. Ndërsa në fshatin alpin verior të Thethit, buldozerët kanë shembur tashmë gati 100 ndërtime.
Tetë ekipe arkitektësh janë shpërndarë nëpër gjithë vendin me 2.4 milionë banorë. Ata do të vendosin cilat ndërtesa duhet të prishen dhe cilat kualifikohen për legalizim retroaktiv. Ndërkohë, më shumë se 18 drejtorë bashkiakë, si dhe disa drejtues komisariatesh policie, janë shkarkuar nga qeveria për mosveprim ndaj ndërtimeve të paligjshme më herët.
Kundërshtarët e planit thonë se kanë shpenzuar kursimet e jetës në prona për turizëm sektor që përbën rreth 20% të Prodhimit të Brendshëm Bruto dhe akuzojnë qeverinë për veprime të pabarabarta, gjë që ajo e mohon.
Zemërimi është veçanërisht i fortë në veri, ku vlerësimet për Ramën janë më të ulëta krahasuar me rivalin e tij kryesor, ish-kryeministrin 80-vjeçar Sali Berisha. Gjatë protestave në Theth javën e kaluar, banorët ngritën bllokada rrugore dhe hodhën koktej molotovi ndaj inspektorëve dhe policisë, sipas raportimeve lokale.
Pasojat e qasjes së lehtë ndaj ndërtimeve u bënë të dukshme në vitin 2019, kur tërmeti më vdekjeprurës në historinë e Shqipërisë vrau 51 persona, plagosi 3,000 të tjerë dhe shkaktoi dëme të mëdha materiale. Kostoja për të riparuar mbi 14,000 prona u vlerësua rreth 1 miliard euro (1.2 miliard dollarë). Prokurorët lëshuan urdhër-arreste për inxhinierë, ndërtues dhe zyrtarë të dyshuar për shkelje të standardeve të sigurisë.
