Këtë të premte është prezantuar projekt-buxheti për vitin e ardhshëm 2023. Ministrja e Financave Delina Ibrahimaj gjatë deklaroi se është parashikuar një rritje ekonomike me 2.6%. Ndërkohë ministrja preku edhe çështjen e inflacionit që ka pasur një trend gjithnjë e në rritje, për të cilin u shpreh se gjatë vitit të ardhshëm, ka gjasa që inflacioni të ulet.
“Për vitin 2023, drafti që po prezantoj adreson sfida të rëndësishme. Politika fiskale do ketë objektiv ulja e stokut të borxhit publik dhe të rritet qëndrueshmëria ekonomike, jemi përballur deri më tani me rritje të madhe të inflacionit e megjithatë e kemi ndjeshëm më të ulët se vendet e rajonit. Morëm masa para se kriza të trokiste në derën tonë, zgjodhëm të subvenciononim çmimin e energjisë.
Ne vendosëm një mburojë që na kushton shumë, duhen ruajtur parametrat kryesorë të ekonomisë, deri më tani kemi përballur mirë pasojat e luftës në Ukrainë.Ekonomia shqiptare ka pasur një rezistencë të mirë, rritja ekonomike në 6 muaj ishte 4.2%.
Nga pikëpamja e ofertës agregate ka pasur rritje pozitive, papunësia ra dhe punësimi u rrit. Është rritur eksporti dhe investimet e huaja, me 35%/ Kursi i këmbimit të lekut ka qenë mjaft i qëndrueshëm, është mbiçmuar ndaj euros me 4% ndryshe nga viti i kaluar.
Do shohim si do shkojë 3 mujori i katërt, të shohim zhvillimet në arenën ndërkombëtare, mos të harrojmë se dhe ekonomitë e vendeve më të mëdha kanë pësuar rënie. Ky është realiteti, ajo që është në dorën tonë është politika e kujdesshme. Parashikohet një rritje ekonomike me 2.6% për vitin 2023. Inflacioni mesatar 6.5-7% për vitin 2022. Ne si ministri financash besojmë se ka gjasa që inflacioni të ulet vitin e ardhshëm”, u shpreh ajo.
