Një rast i mashtrimit u godit nga policia ku, një grup prej 6 personash që hiqeshin si zyrtarë të lartë mashtruan një biznesmen duke i kërkuar shuma të majme parash. Një prej pjestarëve është Florjan Gjergji, i shumëkërkuari i shpallur në kërkim edhe për 4 raste të tjera të mashtrimit. Policia bën me dije se 4 persona janë arrestuar dhe dy të tjerë janë shpallur në kërkim si të akuzuar për skemë mashtrimi në Tiranë. Në pranga kanë përfunduar: Xhonatan Xhaferri, Leonard Xhika, Petro Ferzaj, Mikel Panxhi. Në kërkim Xhensil Qefa e Florian Gjergji 40 vjeç, i cili rezulton se është dhe personi që organizoi skemën e zhvatjes.
Por si funksiononte skema e mashtrimit?
Grupi hiqeshin si zyrtarë të lartë dhe duke përdorur emrin e kryetarit të Bashkisë së Tiranës, Erion Veliaj tentonin të fusnin peshq në ‘rrjetë’. Florian Gjergji dhe grupi i tij kanë tentuar të mashtrojnë biznesmenin e ndërtimeve, Aleksandër Gavoçi, për të përfituar shumën 70 mijë euro. Sipas hetimit është zbuluar se Florian Gjergji, iu shkruan biznesmenëve në aplikacionin Telegram dhe iu prezantohej si zyrtar i lartë.
Ai iu thotë se ka lidhje të afërta dhe të ngushta me politikanë, ministra apo kryebashkiakë dhe u premton marrjen e tenderëve publikë duke iu kërkuar shuma të mëdha monetare si këmbim. Florian Gjergji, konsiderohet nga Policia e Tiranës si njeriu që ka organizuar në shumë raste skemën e mashtrimit duke u prezantuar si zyrtar i lartë.
Prej muajit janar 2023, Gjykata e Tiranës ka caktuar masën e sigurisë “arrest në burg” në mungesë dhe prej 5 muaj ai nuk është mundur të kapet nga policia e kryeqytetit dhe dyshohet se ndodhet jashtë territorit të Republikës së Shqipërisë.
