Massimiliano Allegri do të jetë trajneri i ri i Milanit. Mediat italiane raportojnë se marrëveshja është firmosur dhe tashmë mbetet vetëm zyrtarizimi nga klubi kuqezi.
Prezantimi i Allegrit do të bëhet së bashku me Igli Taren, i cili ka qenë vetë iniciatori i kësaj lëvizjeje dhe ka kërkuar që emrat e rinj të klubit të dalin publikisht bashkë.
Rikthimi i Allegrit në pankinën kuqezi vjen pas më shumë se një dekade, ndërsa trajneri 57-vjeçar ka firmosur një kontratë trevjeçare me një pagë prej 5 milionë eurosh në sezon, pa përfshirë bonuset.
Negociatat janë mbyllur me shpejtësi nga Tare, i cili i ka befasuar të gjithë me efikasitetin e tij. Allegri, i cili ka fituar gjashtë tituj të Serisë A, mes tyre edhe një me Milanin, kthehet në klubin me të cilin fitoi Scudetton e parë në karrierën e tij si trajner në vitin 2011.
