Të pushtuar nga frika, të gjithë qytetarët kanë shumë pyetje për të drejtuar ndaj qeverisë e mjekëve, mirëpo pyetja më e zakonshme është: A do ketë me të infektuar dhe sa do rritet kurba?
Në pamje të parë duket një pyetje të cilës nuk mund t’i jape një përgjigje ekzakte, por qeveria mendon se numri i të prekurve do rritet.
Vetë ministrja e Shëndetësisë Ogerta Manastirliu, por edhe kryeministri Rama kanë bërë thirrje herë pas here për ruajtje qetësie pasi numri i personave me COVID-19 do rritet.
Madje kreu i qeverisë tha se të gjithë mund të jenë të infektuar, por nuk e kuptojmë sepse jo gjithmonë virusi ka shenja.
Së fundmi, drejtuesja e Shërbimit të Inteligjencës Epidemiologjike, pjesë e Task-Forcës së Ministrisë së Shëndetësisë, Eugena Tomini, konfirmoi edhe një herë në një lidhje me “Skype” në emisionin “Real Story”, se numri i personave të prekur me Coronavirus në Shqipëri pritet të rritet nga dita-ditës.
Ndërsa sa i përketë, rastit të Durrësit, ku 73-vjeçara ndërroi jetë, duke u bërë viktima e parë në Shqipëri nga Coronavirusi, duke thënë se para se të shfaqte shenja të virusit vdekjeprurës ajo ka qëndruar në dhomë me dy zonja të tjera, të cilat kanë rezultuar pozitive.
Në qarqet që ka nisur karantimi, a ka rrezik të përhapjes së COVID-19?
Eugena Tomini: Fluksi më i madh i udhëtarëve është përqendruar në zonat me popullatën më të madhe. Sigurisht që harta e monitorimeve policore është më e madhe se harta e të prekurve me COVID-19. Nga 23 rastet pozitive, përveç rasteve të para, kemi dhe kontaktet, zinxhiri pason në ndjekjen e kontakteve hap pas hapi.
Është thënë se do të ketë një rritje të të infektuarve, a pritet që java tjetër të regjistrojë rritje të numrave me COVID?
Priten raste të tjera. Duhet theksuar fakti që 80% e rasteve mund ta kalojnë lehtë. Është shumë e rëndësishme të respektohen masat. Jemi në pritje të rasteve të reja, sepse periudha e gjatë 14 ditore e karantinimit bën që të kemi kontakte më të shumta.
Më duhet t’i rikthehem rastit të Durrësit, viktimës dhe dy të prekurve që lidhen me të. a është ky një rast që e keni nën kontroll ose nën monitorim? Sepse kjo mund të jetë një vatër, që mund të sjell një mini-epidemi.
Të dy rastet e Durrësit janë pa simptoma, gëzojnë shëndet të mirë. Punonjësit shëndetësorë janë testuar dhe kanë rezultuar negativë. Jemi në kontakte të tjera, për të kapur të gjitha hallkat. Rasti ka qenë në një dhomë me dy paciente të tjera, por në momentin që ka shfaqur shenja klinike është izoluar në një dhomë të vetme. Para se të shfaqte shenja, viktima ka qenë me dy zonja, që kanë rezultuar pozitive.
