Presidenti Bajram Begaj ka dekretuar zyrtarisht datën 9 nëntor 2025 për zhvillimin e zgjedhjeve të pjesshme lokale në disa bashki të vendit. Vendimi vjen pas njoftimit të Këshillit të Ministrave mbi vakancat e krijuara në këto bashki.
Zgjedhjet e parakohshme do të mbahen në Tiranë, Vlorë, Berat, Mat, Tepelenë dhe Cërrik. Në pesë prej tyre, vakancat u krijuan si pasojë e dorëheqjes së kryetarëve, ndërsa në Tiranë, kryebashkiaku u shkarkua me vendim të Këshillit të Ministrave, pas propozimit të Këshillit Bashkiak, i cili votoi me shumicë dërrmuese për t’i hapur rrugë zgjedhjeve të reja.
Në njoftimin e Presidencës sqarohet se për rastin e Tiranës u shqyrtua rregullshmëria e procedurës, duke u konkluduar se ajo është zhvilluar në përputhje me ligjin. Presidenti theksoi se nuk hyn në vlerësimin e meritës së çështjes, por respekton vetëm aspektin formal dhe ligjor të procedurës.
Me dekretimin e datës së zgjedhjeve, Presidenti bëri thirrje për një fushatë konkurruese dhe etike, si dhe u shpreh se qytetarët duhet të marrin pjesë masivisht në votim, në respekt të plotë të Kodit Zgjedhor.
