Presidenti i UEFA-s, Aleksander Ceferin, ka vlerësuar se pjesëmarrja e 24 skuadrave në Kampionatin Europian ka sjellë një rritje të ndjeshme të interesit dhe konkurrencës. Duke analizuar formatin që është përdorur për të tretën herë radhazi, Ceferin theksoi se ky ndryshim ka mundësuar pjesëmarrjen e skuadrave që më parë nuk do të kishin mundësi të kualifikoheshin, si Gjeorgjia dhe Sllovenia.
“Është më interesante. Ju mund të shihni Gjeorgjinë dhe Slloveninë, vende që ndoshta nuk do të ishin kualifikuar nëse Euro do të kishte qenë me 16 skuadra dhe që meritojnë të jenë këtu. Mund të shihni se çdokush mund të mundë këdo. Kemi 24 skuadra fantastike dhe nëse do të shtonim dy-tre skuadra, Evropiani do të ishte pa dyshim më i fortë se Botërori,” u shpreh Ceferin.
Ai gjithashtu vlerësoi disa nga lojtarët më të mirë të turneut, përfshirë Bellinghamin, Kane dhe Rodrin, si dhe lojtarin slloven, Karničnik, i cili ka shkëlqyer në turne.
“Pothuajse të gjitha ligat dhe federatat kanë thënë se do ta zbatojnë atë në kampionatet e tyre,” tha Ceferin, duke përgëzuar rregullin që vetëm kapiteni i drejtohet arbitrit. Sipas tij, ky rregull ka sjellë një përmirësim të disiplinës në fushë dhe është pritur mirë nga skuadrat pjesëmarrëse.
Me këtë analizë, Ceferin nënvizoi përparësitë e formatit të ri, duke e krahasuar Kampionatin Europian me Kupën e Botës dhe duke e cilësuar atë si një ngjarje sportive të cilësisë më të lartë.
