Presidenti i Shteteve të Bashkuara të Amerikës, Joe Biden, ka bërë një tjetër gabim në një fjalim publik të enjten, gjatë ditës së fundit të samitit të NATO-s mbajtur në Washington. Teksa po ftonte presidentin ukrainas Volodymyr Zelensky në podium, Biden i drejtohet atij gabimisht si “President Putin”.
“Tani dua t’i jap fjalën Presidentit të Ukrainës, i cili ka aq guxim sa vendosmëri. Zonja dhe zotërinj, President Putin,” tha Biden.
Në sallë, zëra të ndryshëm, përfshirë diplomatë dhe liderë botërorë, thirrën “Zelensky!” për të korrigjuar Biden. Pas kësaj, Biden u kthye te mikrofoni dhe tërhoqi gabimin duke thënë: “Ne do ta mposhtim Presidentin Putin. President Zelensky. Unë isha shumë i fokusuar në mposhtjen e Putinit.”
Zelensky reagoi me sportivitet ndaj situatës së sikletshme, duke thënë: “Unë jam më i mirë.”
Gabimi ndodhi në fund të një fjalimi të fuqishëm të Biden përpara liderëve botërorë në Washington, që kishte për qëllim të përshkruante fuqinë e aleancës në zgjerim të NATO-s nën udhëheqjen e tij. Biden kërkoi mbështetjen e re të madhe ushtarake për Ukrainën nga SHBA dhe aleatët.
Mediat e huaja raportojnë se ky gabim ka të ngjarë të rrisë numrin e thirrjeve që Biden të largohet nga gara, pasi performanca e tij në debatin presidencial ngriti pikëpyetje rreth mprehtësisë së tij mendore.
