Zgjedhja e presidentit të ri është tashmë një tëmatikë e “nxehtë” në politikë.
Ditën e sotme ish-kryeministri Sali Berisha është shprehur se zgjedhje e presidentit të ri do të bëhet me teknika manipulative dhe mafioze. “Rama e shpalli zgjedhjen e presidentit me kodin e mafias. Cili është kodi i mafias, plumbi në zarf, nuk do jenë plumba por tre emra. A e patë, ishte me zarf sekret 3 emra, kështu që a mundet një forcë demokratike të pranojë taktika mafioze, kurrë nuk i pranon”, është shprehur ish-kryeministri Berisha.
Kujtojmë që gjithashtu ditën e sotme Partia Socialiste ka bërë lëvizjen e rradhë, që tregon padurimin për zgjedhjen e presidentit të ri.
Kryetari i Grupit Parlamentar të Partisë Socialiste Taulant Balla ka firmosur kërkesën drejtuar Kryetares së Kuvendit, Lindita Nikolla, ku i kërkohet thirrja e Konferencës së Kryetarëve për fillimin e procedurës së zgjedhjes të Presidentit të Republikës. Data e propozuar nga socialistët për mbledhjen e Konfrerencës së Kryetarëve është 29 Prilli, ndërkohë që zgjedhja e presidentit duhet të jetë kryer përpara datës 24 Maj.
Kujtojmë se për zgjedhjen e presidentit mund të votohet në disa raunde, pasi në 3 votimet e para duhet të ketë një dakordësi të gjerë për emrin, duke nënkuptuar votimin me shumicë të cilësuar.
Prej disa ditësh socialistët kanë ngritur një grup pune, që përbëhet nga Taulant Balla, Elisa Spiropali dhe Damina Gjiknuri, për të dëgjuar propozimet për kandidatët e mundshëm për president.
