Menaxhimi i pandemisë së koronavirusit ka qenë kritika kryesore e kandidatit nga radhët e demokratëve Joe Biden ndaj presidentit amerikan Donald Trump në debatin e tyre nw distancë.
Biden, akuzoi presidentin republikan se mbajti të fshehtë seriozitetin e situatës së koronavirusit që ka infektuar afro 8 milion njerëz në SHBA.
“Ai tha se nuk i tregoi askujt sepse kishte frikë se amerikanët do t’i kapte paniku,” theksoi Biden ndërsa shtoi se “Amerikanët nuk përfshihen nga paniku. Atë e kapi paniku.”
Ish-zëvendëspresidenti amerikan u zotua se nëse zgjidhet, ai do t’i rikthejë shkurtimet e taksave për amerikanët e pasur.
Trump nga ana e tij mbrojti menaxhimin e pandemisë si dhe sjelljen e tij, për të mos mbajtur mask.
“Unë jam president – duhet të takohem me njerëz, nuk mund të rri në bodrum,” tha presidenti amerikan ndërsa shtoi se kishte “dëgjuar variante të ndryshme” rreth efikasitetit të maskave, edhe pse ekspertët e shëndetit publik të administratës së tij kanë thënë që mbajtja e tyre është thelbësore për të ndaluar përhapjen e virusit.
Shefi i Shtëpisë së Bardhë refuzoi ti përgjigjet pyetjeve në lidhje me një hetim të New York Times të dy dekadave të taksave të tij.
Presidenti republikan nuk mohoi raportin e gazetës se ai ka rreth 400 milionë dollarë borxhe, duke argumentuar se kjo ishte një shumë jo e konsiderueshme krahasuar me pasurinë e tij. Ndërsa po ashtu nuk mohoi se kishte paguar vetëm 750 dollarë taksa federale për të ardhurat gjatë vitit të tij të parë në Shtëpinë e Bardhë.
Trump, për herë të parë, tha se do ta pranojë rezultatin e zgjedhjeve, nëse ato do të jenë të drejta. “Përgjigjja është po, do ta pranoj, por dua që ato të jenë zgjedhje të ndershme dhe këtë e do secili”, theksoi presidenti i SHBA-së, i cili është shprehur vazhdimisht se votimi me post mund të manipulohet.
Dy kandidatët pritet të marrin pjesë në një debat të përbashkët më 22 tetor në Nashvill të shtetit Tenezi.
Ish zëvendës presidenti Biden tha se do të marrë pjesë në debat, por shtoi se do t’i kërkojë presidentit që të testohet për koronavirus përpara se të mbërrijë. Trump nuk iu përgjigj pyetjes nëse në debatin e tij të parë me Bidenin më 29 shtator ishte testuar negativ ndaj koronavirusit.
Sipas sondazheve të opinionit Biden ka epërsi ndaj Trumpit. Pavarësisht kësaj në disa shtete gara konsiderohet e ngushtë.
Më shumë se 18 milionë amerikanë kanë votuar në qendrat e votimit apo me post.
Burimi: BBC/ Përshtati: GazetaReforma.com/
