Kreu i Partisë Demokratike Lulzim Basha ka qenë në një takim me gra intelektuale në qytetin e Shkodrës ku ka premtuar financim për mbi 20 mijë artistë. Basha ka thënë se shoqëria duhet t’i mbajë në piedestal artistët, ndërsa qeveria i ka denigruar, siç bëri me shembjen e Teatrit Kombëtar.
Basha i ka bërë thirrje për gratë dhe nënat e Shkodrës që të votojnë në 25 prill, pasi nëse nuk vjen ndryshimi fëmijët e tyre do ta kenë më të vështirë arsimin. Kryedemokrati tha se duhet të mbajmë të rinjtë në vendin tonë dhe jo të sjellim Bangladeshin në Shqipëri.
“Zotimi i parë ka të bëjë me financimin e mbi 20 mijë artistëve shqiptarë. Shoqëria duhet t’i mbajë në pediestal. Por kjo qeveri i ka denigruar. Siç ishte dhe shembja e Teatrit Kombëtar. Gjej rastin që të përsëris zotimin tonë, që me atë orar të zgjatur deri në orën 16:00, ky orar do të na japë mundësinë që artistëve dhe mësuesve t’u besohet misioni i përcjelljes së gjuhëve të huaja, apo mësimeve shtesë, në ambientet e përshtatura. Ftesa ime për nënat, gratë e Shkodrës, është që të votojnë në 25 prill. Ato mund të kenë pikëpyetje. Pas 25 prillit, nëse nuk vjen ndryshimi, fëmijët e tyre do ta kenë më të vështirë për arsimin. Jo të sjellim Bangladeshin në Shqipëri, por të mbajmë të rinjtë në vendin tonë.”, ka thënë Basha.
