Më 2 prill të 2019 qeveria mbylli 12 gurore dhe prishi 26 furra gëlqereje pasi kanë shkatërruar pyjet dhe ambientin në malin e Krujës: Frenki Shpk, Zhukjo shpk, Salillari shpk, Kegli – Duri shpk, PA Konstuksion, Kastrioti shpk, LOTI shpk, Vega shpk, Makaresh shpk, Santara shpk, PRISKA shpk, Babasi COO.
Sot, një vit pas këtij vendimi të marrë nga kryeministri Edi Rama dhe ministri Blendi Klosi është publikuar një denoncim sipas së cilit në dy monumente natyrore Kanioni i Gjipesë dhe Bokërrimat e Vunoit, ushtrojnë aktivitet të jashtëligjshëm, guroret e firmës Gjikuria.
Denoncimi është bërë nga Jamarbër Malltezi, drejtues i Departamentit për Mbrojtjen e Mjedisit në Partinë Demokratike, i cili nëpërmjet një postimi në Facebook i ka bërë një sfidë kryeministrit Edi Rama, dhe dy ministrave, Belinda Balluku dhe Blendi Klosit.
Malltezi ka publikuar edhe një video, ku shihen eskavatorët që vazhdojnë të nxjerrin gurë nga mali.
Në këto kushte mbetet e dyshimtë se nga kush e ka marrë lejen mjedisore kompania në fjalë, e cila ka ndërhyrë duke ndërtuar gurore në monumente mjedisore, në një kohë kur vetë ‘numri 1 i mjedisit’ Blendi Klosi ka deklaruar se ato shkaktojnë dëme të pariparueshme në mjedis.
Sakaq, edhe plani urbanistik mbetet në tym, ndërsa nuk ka ende asnjë reagim zyrtar rreth kësaj çështjeje.
Nga ana tjetër, shkatërrimi i mjedisit pa kriter vazhdon, teksa ministri duket se ka vendosur të mbyllë njërin sy.
Ditën e sotme, Dosja.al ka publikuar disa pamje nga lumi Mat, në shtratin e të cilit, kompania “Salillari” po kryen punime, ku shihen kamionët dhe ekskavatorët e kompanisë Salillari.
Gërryerja në shtratin e këtij lumi për të marrë rërë dhe zhavor ka bërë që rrjedha e tij të devijohet, duke shkaktuar edhe eriozion në tokat bujqësore të banorëve të kësaj zone, duke sjellë sërish rrezikun e përmbytjeve në dimër.
Teksa, qeveria iu bën thirrje shqiptarëve të qëndrojnë brenda duke shmangur grumbullimet e shumta, shumë kompani po ushtrojnë veprimtarinë e tyre pa kriter në terren, duke shmangur edhe protestat e qytetarëve.
Disa ditë më parë banorët e zonës kanë dalë të protestojnë kundër këtij projekti në dëm të mjedisit shqiptar, por sipas dëshmive që ata kanë dhënë për media të ndryshme, rezulton se Policia i ka kërcënuar me gjoba, pasi po thyhen rregullat ndaj pandemisë.
Kujtojmë se “Salillari shpk.” është akuzuar nga opozita për shkak të projektit të ‘Unazës së Re’ në Tiranë, pasi u shpall një nga tre kompanitë fituese për ndërtimin e 2.2 kilometra rrugë (nga pallati me “Shigjeta” në Tiranë deri te sheshi “Shqiponja”), në vlerën 40 milionë euro.
Opozita, por jo vetëm, e kanë akuzuar kreun e ‘Salillarit’ për lidhje të ngushta me qeverinë e Edi Ramës dhe duke e cilësuar si njeriu që bën ‘bamirësitë’ e kryeministrit.
Nuk e dimë nëse firma në fjalë ka përfituar nga raporti miqësor që ka me qeverinë, apo ka ndërhyrë pa leje mjedisor nga ana e saj.
Sa më shumë është folur për mjedisin, aq më shumë është dëmtuar natyra.
Si ministri i Turizmit dhe Mjedisit Blendi Klosi, ashtu edhe kryeministri Edi Rama janë angazhuar për ndalimin e masakrave natyrore, por realiteti është krejt i ndryshëm.
Shoqatat mjedisore kanë mbi dy vjet që zhvillojnë procese gjyqësore dhe një seri protestash për të ndaluar ndërhyrjet pa kriter në mjedis, por puna vazhdon me shpejtësi, duke dëmtuar rëndë natyrën.
