Janë të njëjtat fjalë, të njëjtat skema, i njëjti mashtrim. Ashtu si pas tërmetit të 2019-ës, kur qindra familje mbetën pa shtëpi dhe iu premtua se do të riktheheshin në “banesa më të forta dhe më të mira”, sot e kësaj dite shumë prej tyre jetojnë ende në çadra, në kontenierë apo me qira të përkohshme që nuk i mbulon më askush. U morën miliona euro nga donatorët ndërkombëtarë, u fol për rindërtimin e Shqipërisë nga e para, por realiteti flet për njerëz të braktisur dhe për para të zhdukura. Tani, në tragjedinë tjetër, me zjarret që kanë përfshirë vendin, historia përsëritet me të njëjtin cinizëm.
Në një video-mesazh, Kryeministri Edi Rama njoftoi se janë 207 banesa të dëmtuara nga flakët dhe se 40 prej tyre janë shkrumbuar plotësisht. Përsëri, ai u shfaq me tone të njohura, duke premtuar se askush nuk do të jetë vetëm dhe se shteti do të jetë “në krah” të qytetarëve derisa ata të rikthehen “në një banesë tjetër më të mirë”. Fjalë boshe që i kemi dëgjuar më parë, e që sot vijnë nga një qeveri që ende nuk ka mbajtur përgjegjësi për mijëra të pastrehë të tërmetit.
“Dua t’i siguroj të gjithë, qoftë familjet që kanë humbur banesat plotësisht, qoftë ato të cilat kanë pësuar dëmtime në shtëpitë e tyre nga zjarri, se ne po bëjmë sipas protokollit të situatës dhe me autoritetet përkatëse inventarizimin e plotë të këtyre dëmeve dhe padiskutim se siç ka ndodhur në të shkuarën do të ndodhë përsëri. Askush nuk do të jetë vetëm dhe askush nuk do të mbetet pa e pasur në krah shtetin për t’u rikthyer në një shtëpi më të mirë dhe më të fortë”, deklaroi Rama.
Një tjetër krizë që kthehet në spektakël premtimesh. Një tjetër katastrofë që përdoret për propagandë. Ndërkohë që qytetarëve u digjen shtëpitë dhe bagëtitë, mbi 3.600 krerë të humbur sipas shifrave zyrtare, qeveria përdor të njëjtin skenar: zhurmë, emocione, video-mesazhe, por jo zgjidhje reale.
Sot, si pas tërmetit, familjet janë në rrugë. Dhe sot, si atëherë, qeveria vazhdon të luajë me tragjeditë e njerëzve.
