Gjykata e Posaçme e Apelit ka lënë në fuqi vendimin e Shkallës së parë për të dënuar me 15 vite burg Domart Konjarin, ndërkohë që ky i fundit është ende në arrati.
Ndaj Konjarit rëndojnë një sërë veprash penale duke filluar nga “trafik ndërkombëtar droge” “krijimi i organizatave kriminale” por edhe një seri vrasjesh.
Konjari u lirua fillimisht nga burgu në vitin 2015, gjë që çoi edhe në arratisjen e tij dhe vendimi solli reagime të shumta. Ai u lirua nga Apeli i Krimeve të rënda, gjë që solli përplasje mes Shqipërisë dhe Francës. Ambasadori francez në Shqipëri reagoi ashpër ndaj vendimit, ndërsa ministri i atëhershëm i Drejtësisë, Ylli Manjani kërkoi ndjesë e nisi një inspektim për mënyrën si u ndryshua masa e sigurisë. Në maj të vitit 2016, Gjykata e Lartë rrëzoi rekursin e Prokurorisë dhe i dha të drejtë Apelit të Gjykatës së Krimeve të rënda.
Emri i Konjarit përmendet në vrasjen e Gentian Dervirisht, i njohur ndryshe si “Gent Kadaifi”, më 29 gusht të vitit 1998. Krimi ndodhi pranë “Shkollës së Kuqe” në kryeqytet, ndërsa emri i Konjarit del sërish në vrasjen e ndodhur në vitin 2003 në Rene të Francës. Aty mbeti viktimë Erion Murati për mosmarrëveshje të trafikut të drogës. Konjari dyshohet se është përfshirë edhe në vrasjen e Fatjon Naxhakut më 3 gusht të vitit 2005 në Tiranë.
