Disa ditë më parë kryeministri Edi Rama prezantoi programin e Rindërtimit për Krujën, të ashtuquajtur ‘masterplan, që konsiston në prishjen e shtëpive në lagjen Subash, një nga më të vjetrat e qytetit, me pretendimin se ato banesa janë dëmtuar.
Kreu i qeverisë, ashtu si zakonisht, e dha lajmin në Facebook, ku u shpreh se qytetarëve do tu propozohet një marrëveshje, që konsiston në shpronësimin pronë për pronë, ose truall për truall në sipërfaqen e re që do ndërtohet për të prekurit nga tërmeti.
Mirëpo, përpara se të ndërmerrte vendimin për prishjen, siç duket pushteti qendror nuk e ka marrë parasysh faktin se aty bëhet fjalë për lagjen “Subashi”, me një histori qindravjeçare.
Banorët e kësaj lagjeje pasi mësuan vendimin e ri nga adresa e kreut të qeverisë në Facebook, janë ngritur në protestë, pasi nuk janë dakord që banesat e tyre të prishen.
Banorët kanë treguar për mediat se nga tërmeti shtëpitë e tyre nuk kanë pësuar dëme të mëdha që të justifikohet prishja e plotë e tyre.
“Gazetareforma.com” komunikoi me njërin prej banorëve të kësaj lagjeje, Fatjon Subashi, i cili u shpreh se nuk kanë marrë asnjë informacion zyrtar nga asnjë prej instancave shtetërore dhe lajmin e kanë mësuar rastësisht nga Facebook.
Ai u shpreh se ndonëse kanë kërkuar informacion nga Bashkia Krujë, kjo e fundit nuk ua ka hapur derën, teksa nëpërmjet burimeve jozyrtare kanë mësuar se masterplani përfshin rreth 20 banesa, 2 prej të cilave shtëpi muze.
Këta qytetarë deklaruan do mblidhen para Bashkisë së Krujës për të kërkuar takim me përfaqësues të qeverisë, qoftë ky edhe vetë kryeministri, për të marrë informacione zyrtare rreth projektit.
Ata u shprehën të indinjuar për këtë vendim të pushtetit lokal dhe atij qendror, duke paralajmëruar ta mbrojnë dhe me jetë, të drejtën që ua ka garantuar Kushtetuta, atë të pronës.
Mirëpo, më në fund pas shumë këmbënguljesh ata kanë arritur të takojnë kreun e Bashkisë së Krujës, Artur Bushi.
Burime pranë “Gazetareforma.com” bëjnë me dije se banorëve iu është mundesuar takimi me Bushin, prej të cilit kanë arritur të marin vetëm një angazhimin personal, duke iu premtuar se do kërkojë korrigjimim e projektit për zonën që prek familjen Subashi.
Por, gjithsesi banorët mbeten skeptikë kundrejtë një premtimi të tillë deri në marrjen e një vendimi zyrtar nga qeveria.
“Kjo mund të jetë një taktikë që ndoshta do të blejë kohë dhe të ulë ritmin e kërkesës së llogarisë e të së drejtës qe na takon. Në këto kohë ne jemi në pritje të një përgjigjeje zyrtare, teksa do mundohemi të informohemi sa më shumë”, janë shprehur banorët.
Një vendim i tillë i marrë nga qeveria cënon pronat e këtyre banorëve, që sikurse shprehen banojnë në këtë zonë prej 500 vitesh, dhe për më tepër janë edhe shtëpi muze.
Ndonëse bota përpiqet të ruajë vlerat historike dhe trashëgiminë kulturore, e kundërta ndodh në vendin tonë.
Kështu, banorët shprehen se këtë nisëm do ta vijojnë më tej, në mbrojtje të të gjitha vlerave historike e kulturore të vendit tonë.
