Prania e ushtarëve shqiptarë në Mitrovicë ka qenë arsye që shumë reagime të bëheshin dhe tashmë KFOR ka dhënë përgjigjen e tij duke qetësuar situatën.
Përmes një deklarate zyrtare, KFOR në Kosovë ka thënë se gjendja është e qetë dhe nuk ka asnjë fakt që të tregojë se mund të nisin trazira apo dhunë.
“Pavarësisht nga thirrjet e shumta për mospërhapje të spekulimeve të papërgjegjshme, për fat të keq thashethemet e fabrikuara vazhdojnë të qarkullojnë nëpër media dhe shkaktojnë shqetësime të pabaza tek popullata. KFOR-i konfirmon se gjendja në veri, si dhe në mbarë Kosovën, është absolutisht nën kontroll dhe nuk ka asnjë shenjë apo dëshmi për trazira apo dhunë të mundshme”, thuhet në deklaratë.
Gjithë situata e rënduar është krijuar pas reagimit të Lista Serbe e cila ka treguar për katër ushtarët shqiptarë të cilët ndodheshin në Kosovë në kuadër të KFOR-it, gjë është tashmë është sqaruar.
“Ky nuk është provokim, por është një aktivitet i përbashkët i NATO-së, dhe prania e 4 oficerëve shqiptarë nuk duhet ta habisë askënd pasi që Shqipëria është anëtare e NATO-së tani e 10 vjet. Për më tepër, duhet të dihet se Shqipëria gjithashtu kontribuon në misionin e KFOR-it”, theksohet nga KFOR.
