Prania e madhe e tifozëve shqiptarë në Gjermani për ndeshjet e Kampionatit Europian po shkakton shqetësim të madh në Serbi, sidomos në mediat vendase, ku çdo gjë që lidhet me Shqipërinë evokon kujtime të të famshmes “Provokacija”.
Serbia dhe Anglia do të luajnë në xhiron e parë të Grupit C në Europian, të dielën në orën 21:00. Ndërkohë, mediat serbe janë kapur nga frika e prania e 50 mijë tifozëve shqiptarë në Dortmund, të cilët mund të zhvendosen një ditë më pas në Gelsenkirchen, që nuk është shumë larg, për të shkaktuar kaos me tifozët serbë.
Korrespondentët e “Blic.rs” nga Gjermania raportojnë: “Sipas njohurive tona, ajo ditë do të jetë shumë ‘e nxehtë’, sepse në Dortmund janë 50 mijë tifozë shqiptarë. Shumë prej tyre do të vijnë në Gelsenkirchen aty pranë, ku po luan Serbia, për të krijuar kaos. Në ditën e ndeshjes sonë me Anglinë, kjo do të jetë një sfidë e dyfishtë për tifozët tanë për të treguar se askush nuk mund t’i provokojë ata, veçanërisht nëse e dimë që po vijnë edhe huliganët anglezë.”
Dhjetëra mijëra shqiptarë janë në Dortmund sepse kombëtarja e tyre po luan atje një ditë më parë me Italinë. Kjo prani e madhe ka ngjallur shqetësime të mëdha në Serbi, ku frika e provokimeve dhe tensioneve është e pranishme. Por, ndryshe nga mediat serbe, mediat kroate e shikojnë këtë prani me një sy tjetër.
Portali kroat “index.hr” vlerëson: “Një numër kaq i madh i shqiptarëve nuk është për t’u habitur. Kjo është vetëm kompeticioni i dytë i madh në histori, në të cilin kombëtarja e tyre është kualifikuar. Ndaj ka eufori në vend dhe të gjithë duan ta shikojnë kombëtaren live në Euro. Përveç kësaj, ka një diasporë të madhe shqiptare në Gjermani dhe në vendet fqinje.”
Historia e ndeshjeve mes Shqipërisë dhe Serbisë ka qenë e mbushur me tensione. Incidenti më i famshëm ndodhi në vitin 2014 gjatë një ndeshjeje kualifikuese për Euro 2016, kur një dron me një flamur shqiptar fluturoi mbi stadiumin në Beograd, duke shkaktuar trazira të mëdha. Ndeshja u ndërpre dhe tensionet mes dy vendeve u rritën ndjeshëm.
