Jemi vetëm pak ditë larg çeljes së sezonit turistik dhe instancat kryesore duket se janë duke e marrë masat e duhura.
Ditën e sotme Ministrja e Infrastrukturës dhe Energjisë, Belinda Balluku së bashku me Ministrin e Brendshëm, Sandër Lleshaj kanë bërë inspektimin e pikës kufitare të Morinës.
Kjo pikë është kryesore për arsye sepse njeh edhe fluksin më të lartë të hyrjes dhe daljes nga vendi gjatë sezonit veror.
“Pika kufitare e Morinës është një pikë shumë e rëndësishme duke qenë se është pika që përpunon numrin më të madh të vizitorëve gjatë vitit dhe të gjitha strukturat shtetërore kanë një fokus dhe janë të përqendruara për të ofruar shërbime sa më të mira. Shërbimet e integruara janë ato, të cilat ne synojmë, pasi zvogëlojnë kohën e pritjes dhe ofrohen në mënyrën më cilësore dhe me standarde më të larta”, u shpreh Balluku.
Mirëpo edhe ministri Lleshaj nuk mbeti pas, pasi ka kërkuar shtim të masave për menaxhimin e mirë të fluksit nga të dyja palët, si nga ajo shqiptare ashtu edhe nga ajo kosovare.
“Do të marrim masa në bashkëpunim edhe me autoritetet e Kosovës që ta kompensojmë me masa të shtuara sigurie këtë liri të lëvizjes, që po rritet përditë e më shumë. Duke qenë se jemi edhe në prag të sezonit turistik, unë gjej rastin të kërkoj nga autoritetet dhe t’i inkurajoj ato, për të shtuar masat në drejtim të pritjes dhe menaxhimit sa më të mirë të fluksit të turistëve, me qëllim që ai të rrjedhë i lirshëm por edhe i sigurt. Të shtohet ato masa që tradicionalisht janë ndërmarrë për patrullimin e përbashkët, për kontrollin e përbashkët e çështje të tjera”, tha Lleshaj.
