Në ambientet e Galerisë së Arteve Pamore “Nikolet Vasia” në Durrës është hapur ekspozita e piktorit Fatmir Vasjari, e titulluar “Portretet e jetës së përditshme”.
Në këtë cikël punësh, Vasjari sjell në qendër të vëmendjes njerëzit e zakonshëm, ata që shpesh mbeten në hijet e përditshmërisë, por që përmes artit të tij marrin vlerë dhe dinjitet të veçantë.
Koleksioni përbëhet kryesisht nga portrete të realizuara me një qasje realiste dhe ndjeshmëri të thellë, ku gërshetohen mjeshtëria teknike dhe forca emocionale.
Mjekë, mësues, punëtorë, artizanë, figura të përditshme, të trajtuara me respekt dhe humanizëm në çdo detaj të telajos.
I pranishëm në hapjen e ekspozitës ishte edhe piktori Caush Vathi, i cili theksoi se “Fatmir Vasjari arrin të kapë shpirtin e njeriut të zakonshëm dhe ta kthejë në subjekt arti me një ndjeshmëri që flet qartë për pjekurinë e tij artistike”.
Ekspozita do të qëndrojë e hapur për disa ditë dhe është një ftesë për publikun që të ndalojë e të shohë përtej pamjes së jashtme, një reflektim mbi jetën, punën dhe vlerën e njerëzve që na rrethojnë çdo ditë, por që rrallëherë përjetohen si subjekt arti.
