Portieri i Anglisë, Jordan Pickford, përsëriti “hilen” e shënimit të ekzekutuesve të penalltisë së Italisë në shishen e tij të ujit, në finalen e madhe të “Euro 2020”. Numri një i Evertonit, i cili e bëri një gjë të tillë edhe në Botërorin e Rusisë në vitin 2018 kundër Kolumbisë, këtë herë nuk pati fat, pavarësisht se priti dy nga penalltitë e italianëve (Belottit dhe Jorginhos).
Në listën me udhëzimet e stafit të Anglisë për Pickford, lexohet vetëm një pjesë e shënimeve që i është ngjitur në shishen e ujit: “Florenzi (djathtas), Raspadori (majtas), Toloi (djathtas), Cristante (djathtas), Acerbi (majtas), Bastoni (djathtas) dhe Donnarumma (djathtas). Por, asnjëri prej këtyre nuk goditi penallti. Pickford paralajmërohet gjithashtu që të bëjë kujdes nga kërcimi që bën mesfushori Jorginho, në momentin që ekzekuton penalltinë e tij.
Pickford do të ishte edhe vetë një ekzekutues penalltie. Ai do të godiste penalltinë e gjashtë të Anglisë, pas Bukayo Saka, por nuk e pati këtë fat. Trajneri Southgate, mbrojti skuadrën e tij pas humbjes me penallti kundër Italisë. “Unë e di se disa prej këtyre fyerjeve që kanë ardhur nga jashtë, janë njerëz që nuk merren fare me këtë punë. Kombëtarja i përfaqëson të gjithë dhe ky unitet duhet të vazhdojë. Ne e kemi treguar forcën e vendit tonë kur jemi të bashkuar”, u shpreh Southgate.
