Përmes përgjimeve të marra nga SPAK, është zbuluar se gjyqtarja e Elbasanit, Pajtime Fetahu, ka qenë e përfshirë në një tentativë për hakmarrje ndaj Saimir Kodrës, drejtuesit të emisionit “Stop”.
Kodra ka denoncuar shpesh në emisionin investigativ të Tv Klan çështjet korruptive të kësaj gjyqtareje.
Një personazh i njohur nga krimi e ka furnizuar gjyqtaren me një telefon SkyEcc, me anë të të cilit ajo ka komunikuar me figura të tjera të botës së krimit për të urdhëruar goditjen e gazetarit.
Lidhja mes Fetahut dhe bandës është mundësuar nga vajza e saj, Megi Fetahu, e cila ka shprehur se “mami u kënaq kur i thash se do të flas me ju”.
Për realizimin e krimit, gjyqtarja ka angazhuar Endri dhe Klejdi Çopja, të dy të njohur për lidhjet me krimin e organizuar.
Endri Çopja është i përfshirë në disa ngjarje kriminale të rënda, përfshirë atentatin me tritol ndaj Lulzim Kullës në vitin 2018.
Sipas hetimeve, ai ka qenë i angazhuar për të goditur dhe mundësisht për të eliminuar fizikisht Saimir Kodrën.
Pavarësisht përpjekjeve të grupit kriminal, atentati nuk është realizuar pasi ata nuk kanë arritur ta gjejnë gazetarin.
Në një komunikim mes Marjus Lulajt, pjesëtar i grupit të Suel Çelës, dhe gjyqtares Fetahu, thuhet se nuk është e lidhur me djegien e makinave të familjarëve të Kodrës, por se ai mund të jetë përgjegjës për ngjarje të tjera. Lulaj gjithashtu shprehet se do të hakmerret ndaj Kodrës për dëmin që i ka shkaktuar gjyqtares.
Fetahu është shprehur e shqetësuar nga denoncimet e emisionit “Stop”, duke paralajmëruar bandën se këto denoncime mund të çojnë në pezullimin e saj nga detyra dhe humbjen e mbështetjes për grupin kriminal në gjykatë.
“Ai, djali i vogël, të gënjej me jetën time, nuk ka djegur asgjë, po pse ty do të gënjej unë, ai mund të ketë djegur shtëpinë e familjarëve të Saimir të Stopit, se kam të sigurt. Unë kam menduar që e ke kuptuar. Atë e kanë bërë shokët e mi me dijeninë time. Në fakt unë doja të dëmtoja direkt Saimirin, ishte e pamundur, ruhej shumë. Flinte te “Plaza” vetë qeni, por do ta kap. Atë që të ka ba ty, ai do ta paguajë 10-fish. Do më falësh që nuk jam marrë më shumë me të, se e di jemi të ngarkuar.
Ta kalojmë këtë valë, nuk të falet, do ta paguajë për atë që të ka bërë ty. Me atë jam marrë personalisht”, thuhet në bisedën e zbardhur.
Sipas dosjes, një tjetër person që ishte në shënjestër të gjyqtares për hakmarrje ishte avokati Arben Llogazi, i cili është identifikuar si një rrezik për gjyqtaren, pasi ai ishte burimi i informacionit për aferat e saj që i transmetoheshin Saimir Kodrës.
Gjatë bisedave me Lulajn dhe Çopjat, Fetahu ka paralajmëruar grupin kriminal të ketë kujdes për avokatin, duke thënë se ai mund të jetë i përfshirë në denoncimet ndaj saj. Grupi i është përgjigjur se avokati do të ketë fatin e avokatit Ravik Gurra, i cili u ekzekutua në vitin 2019 në Elbasan.
Kështu, krahas Saimir Kodrës, avokati Arben Llogazi ishte gjithashtu në shënjestër të grupit kriminal që vepronte për llogari të gjyqtares Fetahu.
