Gazetari Artan Hoxha ka qenë sonte i ftuar në “Opinion”.
Ndër të tjera, gjatë bisedës Hoxha është kthyer pas në kohë dhe ka treguar një rast, në të cilin është telefonuar nga Gramoz Rexhepi, i përfshirë në vrasjen e Jani Prengës.
Rexhepi e ka marrë në telefon nga burgu i Quitos, në vitin 2017.
Kjo pasi gazetari një natë më parë kishte përmendur në një emision faktin që grupet kriminale shqiptare, janë shumë të rrezikshme.
“Në vitin 2017 kemi qenë në një emision për kanabisin në Shqipëri. U thashë që të mos merreshin me kanabisin pasi grupet janë aq përpara saqë kur ta marrim vesh, ne do të mbledhim kufoma. Ishte data 15 shtator 2017. Ishte ditë epremte dhe thashë që ky emision nuk shihet e s’do ndihet. Me bie një person në telefon dhe kur më ra për herë të dytë e hapa. Isha në Vlorë. Ishte nje prefix i panjohur.
Ishte Gramoz Rexhepi dhe më mori nga Quito në telefon. Me tha: Më ke përmendur në një emision. Ke bërë një shkrim në gazetë. I thashë nuk shkruaj më në gazetë. Dhe në atë moment mbylla telefonin. E kupton nga burgu me mori në telefon? Dhe kur u kap tek hotel Tirana, ai u trajtua si një student drejtësie. Ai e ka nisur si një vrasës me pagesë. Është rang krejt tjetër nga këta që jemi mësuar të shikojmë ne. ka vrarë me gjakftohtësi, Durim Kasmin dhe dy efektivë,”– tha Hoxha.
Kush është Gramoz Rexhepi?
Gramoz Rexhepi ka porositur nga burgu në Ekuador rrëmbimin e Jani Prengës.
Ai ndodhet në burg që prej 2014.
Ndërsa, për policinë shqiptare Rexhepi njihet si një person me rrezikshmëri të lartë shoqërore.
Ai ka kryer disa vepra penale dhe njihet si koka e një bande që trafikon lëndë narkotike.
