Një nga platformat më të mëdha të pedofilisë në botë, Kidflix, është mbyllur si rezultat i një operacioni ndërkombëtar të drejtuar kundër shfrytëzimit seksual të fëmijëve.
Hetimi, i cili u mbështet nga Europol, u drejtua nga Policia Kriminale Shtetërore e Bavarisë dhe Zyra Qendrore Bavareze për Ndjekjen e Krimit Kibernetik në Gjermani, me pjesëmarrjen e 35 vendeve, përfshirë Shqipërinë.
Autoritetet gjermane dhe Europol informuan Policinë e Shtetit se një shtetas shqiptar ishte i përfshirë në këtë veprimtari kriminale.
Pas referimit të materialeve nga Drejtoria për Hetimin e Krimeve Kibernetike, Prokuroria e Tiranës regjistroi një procedim penal për veprën “Pornografia me të mitur”. Hetimet çuan në identifikimin e të dyshuarit, shtetasit M. Z., 29 vjeç, banues në Tiranë.
Gjykata e Shkallës së Parë e Juridiksionit të Përgjithshëm Tiranë urdhëroi kontrolle në banesën e tij, ku u sekuestruan tre celularë dhe një laptop, të cilët po i nënshtrohen ekzaminimeve kompjuterike.
Kidflix, i krijuar në vitin 2021 nga një kriminel kibernetik, u bë shpejt një nga platformat kryesore të shpërndarjes së materialeve të abuzimit seksual të fëmijëve.
Me mbi 1.8 milionë përdorues, platforma u përdor për të shpërndarë rreth 91 000 video unike me përmbajtje abuzive, të cilat përfshinin 6 288 orë materiale filmike. Ndryshe nga platformat e tjera të ngjashme, Kidflix jo vetëm lejonte shkarkimin e këtyre materialeve, por ofronte edhe transmetim të drejtpërdrejtë.
Përdoruesit paguanin për përmbajtjen përmes kriptovalutave, të cilat konvertoheshin në tokena për të fituar akses në videot me cilësi më të lartë.
Më 11 mars 2025, serveri i Kidflix, i cili përmbante 72 000 video në atë moment, u kap nga autoritetet gjermane dhe holandeze.
Hetimi rezultoi në identifikimin e gati 1 400 të dyshuarve në mbarë botën, me 79 persona të arrestuar deri tani, për përfshirje në shpërndarjen e materialeve të abuzimit. Disa prej tyre ishin gjithashtu të përfshirë në abuzim fizik ndaj fëmijëve.
Operacioni “Stream”, i mbështetur nga Europol dhe drejtuar nga autoritetet bavareze, është një nga ndërhyrjet më të mëdha kundër shfrytëzimit seksual të fëmijëve në internet.
Europol, përmes Qendrës Evropiane për Krimet Kibernetike, analizoi mijëra video dhe ndihmoi autoritetet kombëtare në identifikimin dhe arrestimin e të dyshuarve.
Roli i agjencisë në koordinimin e shkëmbimit të informacionit dhe veprimet e përbashkëta midis vendeve pjesëmarrëse ishin thelbësore për suksesin e operacionit. Hetimet për këtë rrjet kriminal vijojnë.
