Qeveria ka miratuar një vendim të ri që hap rrugën për përfshirjen e qytetarëve në polici, në mënyrë vullnetare.
Ky akt normativ përcakton rregullat mbi organizimin, funksionimin dhe fushën e veprimit të policimit vullnetar në Shqipëri.
Çfarë përfshin policimi vullnetar?
Ky model bashkëpunimi synon të forcojë lidhjen mes komunitetit dhe Policisë së Shtetit, duke lejuar qytetarët të kontribuojnë në sigurinë publike.
Personat e interesuar mund të angazhohen deri në 25 orë në javë, pa pagesë, në funksione që ndihmojnë policinë dhe përmirësojnë jetën në komunitet.
Fushat ku mund të angazhohen policët vullnetarë përfshijnë:
• Ruajtjen e rendit gjatë aktiviteteve publike;
• Menaxhimin e trafikut pranë shkollave dhe zonave të populluara;
• Patrullime në lagje për parandalimin e krimit;
• Ndihmë për sigurinë në shkolla;
• Fushata ndërgjegjësimi për mjedisin;
• Mbështetje në raste fatkeqësish apo operacione kërkim-shpëtimi.
Kush mund të aplikojë?
Kandidatët duhet të jenë shtetas shqiptarë, me arsim të mesëm të përfunduar dhe pa të kaluar penale. Nga përfshirja përjashtohen funksionarë të sistemit të drejtësisë, anëtarë të forcave politike, punonjës të shërbimeve të tjera të sigurisë dhe profesionistë të tjerë me konflikte interesi.
Aplikimi realizohet pranë Drejtorisë Vendore të Policisë së qarkut të banimit, përmes një formulari standard dhe dokumentacionit përkatës.
Pas përzgjedhjes, kandidatët futen në një listë të posaçme dhe njoftohen për hapat e mëtejshëm të përfshirjes në këtë shërbim.
