Një incident është shënuar ditën e sotme mes policisë dhe gazetarit të “News 24”, Ergys Gjençaj. Prokuroria e Tiranës ka reaguar për rasti nën fjalë duke thënë se po hetohet.
Sipas njoftimit zyrtar, prokuroria thekson se grupi hetimor po heton mbi veprimet e kryera nga punonjësit e policisë për të përcaktuar ligjshmërinë e veprimeve të tyre.
“Prokuroria e Rrethit Gjyqësor Tiranë, në bashkëpunim me SHÇBA janë duke kryer verifikime të thelluara në lidhje me incidentin e ndodhur me gazetarët në rastin e operacionit policor antinarkotike ne një zone te Tiranës.
Grupi hetimor po heton rastin mbi veprimet e kryera nga punonjësit e policisë për të përcaktuar ligjshmërinë e veprimeve të tyre.
Sigurojmë opinionin publik që Prokuroria në bashkëpunim me të gjitha organet ligjzbatuese do jetë gjithmonë pranë qytetarëve, mediave dhe kujtdo personi që mund të cënohen nga veprimet arbitrare”, thuhet në njoftimin zyrtarë të Prokurorisë.
Sjellim në vëmendje se një ngjarje e pazakontë ka ndodhur këtë të martë pranë “Shkollës së Bashkuar” në Tiranë. Gazetari Ergys Gjençaj është ndodhur rastësisht në Shkollën e Bashkuar ku policia po realizonte një aksion antidrogë. Gazetari i News 24 ishte duke filmuar në momentin që një makinë tip “Benz” është larguar me shpejtësi dhe nuk i është bindur urdhrit të policisë për të ndaluar.
Në momentin që kanë parë gazetarët duke filmuar policia ka ndërhyrë menjëherë duke e shtrirë në tokë dhe duke mos e lejuar që të filmonte aksionin që po zhvillonin. Në një prononcim për “Neëws 24” gazetari është shprehur se e vetmja gjë që po bënte ishte detyra e tij.
