Policia ka shpallur në kërkim tre persona për protestën që u mbajt ditën e djeshme para kryeministrisë kundër rritjes së çmimeve. Në një njoftim bëhet me dije se po punohet për shoqërimin e e shtetasve, N. L, V. K, A. G dhe E. K, pasi sipas policisë, ata kanë bllokuar në mënyrë të paligjshme rrugën.
“Më datë 06.10.2021, u referuan materialet në Prokurorinë pranë Gjykatës së Shkallës së Parë Tiranë dhe punohet për shoqërimin e shtetasve, N. L, V. K, A. G dhe E. K, pasi në bulevardin “Dëshmoret e Kombit”, kanë bërë bllokimin në mënyrë të paligjshme të rrugës, duke penguar qarkullimin e mjeteve, të identifikuar si pjesmarrës dhe organizatorë.
Materialet i kaluan Prokurorisë pranë Gjykatës së Shkallës së Parë Tiranë, për veprime të metejshme hetimore”, thuhet në njoftim.
Kujtojmë që ditën e djeshme qindra qytetarë u mblodhën para Kryeministrisë në bulevardin “Dëshmorët e Kombit” për të protestuar kundër rritjes së çmimeve për një sërë produktesh, duke filluar nga buka e ushqimet e shoprtës e së shpejti edhe rritja e paralajmëruar e çmimit të energjisë elektrike. Protesta u thirr në rrjetet sociale dhe nuk u shoqërua me incidente apo përplasje me policinë, megjithatë kjo e fundit e ka gjetur një mënyrë për të shoqëruar disa organizatorë e pjesëmarrës.
