Agim Kajmaku, ish-kryebashkiaku i Vorës u shkarkua nga KQZ më 1 nëntor pasi shkeli ligjin e dekriminalizimit duke fshehur një dënim në Greqi, rast ky i denoncuar nga Partia Demokratike.
Ai është akuzuar gjithashtu për falsifikim të vulës, falsifikim të dokumenteve zyrtare dhe vazhdim i detyrës pas dorëheqjes.
Mirëpo, Kajmaku u arratis duke u shpallur në kërkim që në muajin nëntor, teksa në ndjekje të tij është vënë edhe Interpol.
Policia dhe Prokuroia kanë deklaruar se nuk kanë mundur të gjejnë vendndodhjen e Kajmakut, mirëpo “Exit News” pretendon se ka arritur ta lokalizonte atë tre ditë rresht në qendër të qytetit.
Sipas medias në fjalë, ai është parë disa herë duke pirë kafe në Hotel Autostation në Vorë, ndërsa fundjavën e shkuar është parë gjithashtu duke ecur në një rrugë kryesore në Tiranë, vetëm rreth 500 metra nga Drejtoria e Policisë së Tiranës, i shoqëruar me një person tjetër.
Ai kishte veshur një kapele blu të errët dhe një xhaketë blu, me jakën e ngritur lart, teska Exit News ka publikuar këtë foto që mendohet të jetë bërë pikërisht atë ditë.
Pasi eci në një rrugë të populluar dhe të njohur, Kajmaku është futur në një bar-kafe dhe ka qarkulluar me një makinë të Autoritetit Kombëtar të Ushqimit (AKU), ku punon një nga të afërmit e tij.
