Ashtu si në zonat e tjera bregdetare të vendit, Policia ka ndërmarrë një aksion për lirimin e hapësirave publike edhe në bregdetin e Vlorës.
Operacioni është përqendruar në dy nga zonat më të frekuentuara gjatë sezonit turistik, në Radhimë dhe Orikum, ku janë hequr shezlongë, çadra dhe struktura të përkohshme të vendosura pa leje.
Sipas njoftimit zyrtar, disa nga subjektet që shkelën ligjin janë paralajmëruar apo proceduar nga ana e autoriteteve.
Njoftimi i policisë:
Policia Bashkiake e Vlorës në bashkëpunim me Policinë e Shtetit ka nisur një aksion për lirimin e hapësirave publike dhe verifikimin e subjekteve që shfrytëzojnë vijën bregdetare pa kontratë.
Në orët e para të mëngjesit, efektivët e dy strukturave kanë ndërhyrë në zonat turistike të Rradhimës dhe Orikumit, ku janë konstatuar disa subjekte që kishin zaptuar hapësirat publike në kundërshtim me ligjin ose nuk dispononin dokumentacionin përkatës për shfrytëzimin e plazhit.
Gjatë aksionit janë hequr shezlongë, çadra dhe struktura të përkohshme që ishin vendosur pa leje, ndërsa disa prej subjekteve janë paralajmëruar apo proceduar për shkelje të ligjit.
Autoritetet kanë paralajmëruar se kontrolle të tilla do të vijojnë në të gjithë gjatësinë e bregdetit të Vlorës, me qëllim garantimin e hapësirave publike për pushuesit dhe zbatimin e ligjshmërisë.
Në prag të sezonit turistik, bashkia dhe policia kanë theksuar se nuk do të lejohet asnjë abuzim apo zaptim i paligjshëm i bregdetit.
