Në 4 shtator 2023, një turiste franceze, duke udhëtuar nga Tirana drejt Vlorës me një nga makinat e kompanisë “Blue Taxi”, është ngacmuar seksualisht nga shoferi i taksisë.
Gjatë rrugës, shoferi i taksisë ka nisur ta ngacmojë seksualisht turisten duke e prekur nga krahët fillimisht e më pas duke i nxjerrë organin gjenital.
Pas denoncimit të rastit të rëndë në media, ka reaguar Policia e Shtetit, duke konfirmuar tentativën për përdhunim.
Por, në njoftim Policia është kujdesur të fshehë faktin se taksia i përkiste kompanisë “Blue Taxi”, me bashkëpronarë Krenar Cocaj dhe Akeljan Brami, i pari një personazh me precedentë penalë, ndërsa Brami pjesë e call centrave.
“Nga verifikimet e kryera nga strukturat e Policisë ka rezultuar se kjo shtetase nuk ka bërë kallëzim në asnjë strukturë policore në të gjithë vendin.
Po nga verifikimet e kryera ka rezultuar se shtetasja franceze, më datë 04.09.2023, ka udhëtuar me një automjet taksi të një kompanie që ofron shërbim taksi, dhe në mes të rrugës i ka kërkuar kompanisë, një automjet tjetër, po të kësaj kompanie, me pretendimin se drejtuesi i automjetit po e ngacmonte seksualisht. Kompania i ka vënë në dispozicion një tjetër automjet të kompanisë dhe turistja franceze është larguar.
Në përfundim të veprimeve të para hetimore të kryera nga Specialistët e Sektorit për Hetimin e Krimeve Kibernetike në DVP Tiranë drejtuesi i taksisë shtetasi E.C, 28 vjeç, u shpall në kërkim.
Pas kërkimeve për lokalizimin dhe kapjen e tij është bërë e mundur kapja dhe shoqërimi i 28 vjeçarit në Drejtorinë Vendore të Policisë Tiranë për veprime të mëtejshme procedurale të cilat po kryhen nën drejtimin e Prokurorit“, ka sqaruar policia.
Kompania me administrator Dashnor Llugaliu mund të jetë përfshirë edhe në pastrim parash.
Edhe pse kapitali i saj është 12 milionë lekë, kompania deklaron deri më tani rreth 100 makina Hyundai, me një vlerë disa milionë euro.
Në shkurt të këtij viti, një aksident me vdekje ndodhi në zonën e Yzberishtit në kryeqytet, ku një taksi tip “Hunday” e kompanisë Blue Taxi, përplasi për vdekje një qytetar.
Viktimë mbeti 69-vjeçari Albert Zade, i cili ishte duke kaluar rrugën kur u përplas nga mjeti i drejtua nga 31-vjeçari Laurent Lavdaraku.
Në njoftimin për rastin, policia nuk specifikoi faktin që ka qenë një taksi ajo që ka përplasur 69-vjeçarin, duke i shkaktuar vdekjen.
“Më datë 09.02.2023, rreth orës 18:40, në rrugën ‘Tre Dëshmorët’, shtetasi L.L., 31 vjeç, duke drejtuar automjetin ka aksidentuar shtetasin A.Z., 69 vjeç, i cili si pasojë e aksidentit ka ndërruar jetë. Grupi hetimor ndodhet në vendngjarje dhe po punon për sqarimin e rrethanave të aksidentit”, deklaroi policia e Tiranës.
Megjithatë, pamjet nga vendngjarja treguan se mjeti që përplasi për vdekje qytetarin ditën e djeshme ishte me logon “Blue Taxi”.
Në 29 mars të këtij viti, një mjet ‘Hundai’ i kompanisë ‘Blue Taxi’, është aksidentuar me një mjet tjetër dhe një motor.
Edhe në këtë rast, policia është kujdesur të shmangë faktin se shkaktar i aksidentit ishte shoferi i taksisë së kompanisë së Krenar Cocajt dhe Akeljan Bramit të call centrave./Prapaskena
