Drejtoria e Forcës së Posaçme Operacionale në Policinë e Shtetit ka finalizuar tre operacione për kapjen e shtetasve me rrezikshmëri të lartë, të shpallur në kërkim ndërkombëtar.
Operacionet, të realizuara në koordinim me Policinë italiane dhe suedeze, çuan në arrestimin e tre personave të kërkuar.
Shtetasi Ylli Zherri (alias Ylli Gjuci), 32 vjeç, i lindur në Mamurras, u kap në Mamurras. Ai ishte shpallur në kërkim nga Gjykata e Vareses në Itali për “Trafikim të lëndëve narkotike” si pjesë e një organizate kriminale, dhe ishte caktuar masa e sigurisë “Arrest në burg”.
Po ashtu, në Shkodër u arrestua Lumnije Freskina (alias Lumnije Danaj), 60 vjeçe, e kërkuar nga Gjykata e Apelit të Firencës, Italia, për të njëjtën akuzë të trafikut të narkotikëve.
Arrestimi i tretë ishte ai i shtetasit suedez Ahmad Farhan, 37 vjeç, i cili ishte kërkuar nga Gjykata e Orebros në Suedi për “Kanosje serioze për vrasje”.
Interpol Tirana po bashkëpunon me homologët në Itali dhe Suedi për të finalizuar ekstradimin e këtyre personave.
