Gazetari investigativ, Artan Hoxha ka denoncuar një atentat të dështuar, i cili nuk është raportuar nga Policia e Shtetit. I ftuar në “AbcNews”, Hoxha ka publikuar pamjet e një makine të djegur në rrugën dytësore të Rinasit, e cila sipas tij ka qenë e mbushur me armë zjarri. Nga burimet e tij, gazetari tha se bëhej fjalë për një atentat të dështuar, i marrë përsipër nga disa vrasës me pagesë, të cilët pasi dështuan, u detyruan që të shkatërronin të gjitha provat.
“Një ngjarje është kaluar në heshtje nga ana e Policisë së Shtetit. Në 5 tetor në zonën e Rinasit, ku kalonin grabitësit është gjetur një makinë e djegur. Nuk është raportuar. Një automjet është gjetur i djegur, brenda kishte armë dhe dyshohet se ishte përdorur nga disa vrasës me pagesë. Ka kaluar në Rinas, ka përplasur dy automjete të tjera. Bëhet fjalë për një atentat të dështuar por nuk është vërtetuar se për kë personazh bëhet fjalë,”-u shpreh gazetari.
Edhe pse ngjarja raportohet të ketë ndodhur më 5 tetor, deri më tani nuk ka asnjë njoftim zyrtar nga Policia, të cilët sipas Artan Hoxhës, ende nuk e kanë zbuluar se cili ishte objektivi për t’u eliminuar.
