Policia e Tiranës ka ndërmarrë një operacion antidrogë prej mbrëmjes së djeshme nga i cili është zbuluar një laborator droge. Laboratori ishte vendosur në disa ndërtesa të vjetra, magazina shtetërore që ruheshin me roje. Aktiviteti i paligjshëm është sinjalizuar nga ish-deputeti i PD-së Halit Valteri, i cili më pas kaloi me PS. Policia ka shoqëruar dhe marrë në pyetje 7 persona, mes tyre edhe rojet. Operacioni është ende në vijim, teksa nuk dihet ende sasia e drogës së sekuestruar.
Agjentët e Komisariatit nr. 2 dhe Antidrogës në një magazinë 2 katëshe në zonën e Selitës në Tiranë, ditën e sotme kanë gjetur rrënjë kanabis sativa në katin e dytë, të kultivuara me llampa. Sipas informacioneve paraprake magazina është shtetërore, ku kati i parë është në përdorim të ASHK. Dyshohet se magazina përdorej prej një kohe të gjatë për kultivimin e drogës, ndërsa 2 persona janë arrestuar.
