Në prangat e policisë së Durrësit ka rënë një 21-vjeçar, i cili ishte duke drejtuar automjetin pa patentë. Gjatë ndalimit nga policia 21-vjeçari bënte lëvizje të dyshimta për të fshehur çantën e dorës që kishte në makinë, ky fakt e ka shtyrë policinë që të ushtronte kontroll fizik ndaj tij dhe mjetit me të cilin udhëtonte. Gjatë kontrollit 21-vjeçarit i është gjetur në makinë lëndë kanabis dhe një shkop metalik.
Mësohet se materialet i proceduriale i kaluan Prokurorisë së Rrethit Gjyqësor Durrës, për veprime të mëtejshme.
Njoftimi i Policisë
Shërbimet e Qarkullimit Rrugor në DVP Durrës, në vijim të kontrolleve të vazhdueshme për parandalimin e aksidenteve rrugore dhe rritjen e parametrave të sigurisë, kanë konstatuar në rrugën “Vëllazërimi”, Durrës, drejtuesin e një mjeti që po përdorte aparatin celular. Pas ndalimit nga punonjësit e Policisë është konstatuar se drejtuesi nuk kishte leje drejtimi.
Gjatë veprimeve nga punonjësit e Policisë, ky shtetas bënte lëvizje të dyshimta për të fshehur çantën e dorës. Nisur nga ky fakt, shërbimet e Policisë kanë ushtruar kontroll fizik ndaj tij dhe në mjet, ku kanë gjetur dhe sekuestruar një sasi lënde narkotike cannabis sativa dhe një shkop metalik.
Në vijim të veprimeve nga specialistët për Hetimin e Narkotikëve në DVP Durrës u arrestua në flagrancë shtetasi K. H., 21 vjeç, banues në Durrës, për veprat penale “Prodhimi dhe mbajtja pa leje e armëve të ftohta” dhe “Prodhimi dhe shitja e narkotikëve”.
