Një tjetër rast i brutalitetit policor ka ndodhur në Tiranë gjatë ditës së sotme. Një i ri është shoqëruar me forcë pasi nuk kishte maskën mbrojtëse. Ngjarja ka ndodhur në qendër të kryeqytetit, pranë Bibliotekës Kombëtare teksa janë disa efektivë policie që përdorin forcën ndaj të riut dhe e shoqërojnë për në makinën e policisë.
Faqja “Jeta Osh Qef” ka publikuar tre video ku shihet qartë dhuna e policisë ndaj të riut që tenton disa herë t’u shpëtojë efektivëve. Ndërkohë janë qytetarët ata që dëgjohen duke i kërkuar policisë ta lënë të lirë të riun, pasi mosmbajtja e maskës ndëshkohet me gjobë.
‘Vëri gjobë mo vlla, pse e shoqëron?!”, dëgjhohen qytetarët t’i thonë efektivëve të policisë.
Në fund të aktit normativ për mbajtjen e maskës me detyrim thihet qartë se ndëshkimi është gjobë 3 mijë deri në 5 mijë lekë, ndërkohë policia e ka shoqëruar të riun pa dhënë asnjë shpjegim tjetër.
“Drejtoresha e ISHP, Albana Fico në fund të deklaratës së saj ka rikujtuar qytetarët se mbajtja e maskës është e detyrueshme në çdo ambient jashtë shtëpisë dhe mos zbatimi i kësaj mase do të ketë penalitete sipas Aktit Normativ me 3 mijë lekë për shkelësit për herë të parë, dhe 5 mijë lekë për shkelje të përsëritur.”
