Me urdhër të Gjykatës, Prokuroria dhe Policia e Elbasanit zhvilluan në orët e para të mëngjesit të së hënës një seri kontrollesh në 14 banesa të personave të dyshuar për lidhje me inceneratorin e qytetit.
Sipas informacioneve, kontrollet janë kryer tek mbikëqyrësit e kontratave të bashkisë, te disa administratorë e drejtorë. Kontrollet vijnë në kuadër të hetimeve që po zhvillohen për këtë incenerator, për veprën penale “shpërdorimit të detyrës” dhe “ndotje mjedisi”
Ky aksion është pjesë e hetimeve të nisura një vit më parë, fillimisht për zjarrin e madh që përfshiu fushën e mbetjeve në vitin 2024.
Pritet që gjatë ditës të bëhen publike detaje të tjera mbi rezultatet e aksionit dhe emrat e personave të përfshirë në hetim.
Inceneratori i Elbasanit
I pari që u vu në shënjestër të hetimeve, ishte inceneratori i Elbasanit i cili u sekuestrua nga prokuroria fundin e vitit 2021, me masa të shumta sigurie, përfshirë ish-ministrin Lefter Koka, zyrtarë të tjerrë, përfshirë kërkesat për arrest të Stela Gugalles, pronarja e kompanisë “Albtek Energy” si dhe Klodian Zotos, pronar i kompanisë Integrated Technology Services, apo edhe Mirel Mërtirit.
Akuzat ishin të rënda, deri në korrupsion i zyrtarëve të lartë dhe pastrimi i parave. Këta tre të fundit vijojnë të jenë në arrati dhe nuk janë përballur vetë para togave të zeza.
Tashmë çështja e inceneratorit të Elbasanit është ‘vulosur’ sa i përket fatit penal. Për dosjen e hetuar nga prokurori Klodian Braho, tashmë ka një vendim të formës së prerë deri në Apelin e GJKKO.
Për Elbasanin GJKKO e dënoi ish-ministrin Lefter Koka me 5 vjet e 8 muaj burg për korrupsion, ndërsa e shpalli të pafajshëm për akuzën e “shpërdorimit të detyrës” dhe i sekuestroi aksionet në kantinën e pijeve në Durrës, në vlerën e korrupsionit të kryer, 3.7 milionë euro. Ish-deputeti Alqi Bllako, mori pafajësi nga shkalla e parë për akuzën e shpërdorimi të detyrës. Biznesmeni Klodian Zoto, u deklarua fajtor dhe u dënua me 10 vite burg. Të njëjtën masë dënimi gjykata dha edhe ndaj biznesmenit tjetër Mirel Mertiri. Ndërkohë Stela Gugallja, administratore në inceneratorin e Elbasanit, u dënua me 7 vjet heqje lirie. Me 4 vjet burg u dënua Pëllumb Abeshi, ish-kryetar i Komisionit të Shpronësimit, ndërsa për anëtarin e komisionit Bardhyl Cabiri, GJKKO dha dënimin me 2 vjet burg dhe anëtaren Jonida Zeqo 4 vjet. 1.4 vite do të vuajë edhe ish-anëtari tjetër i komisionit, Serafin Papa. Të gjithë të dënuarit përfituan ulje me 1/3 nga gjykimi i shkurtuar.
GJKKO vendosi që kompanitë “Albtek sh.p.k.” dhe “Integrated Energy”, t’u hiqet titulli i subjektit juridik dhe aksionet e tyre ti kalojnë shtetit. Ky vendim u ankimua si nga SPAK ashtu edhe mbrojtja. Pas shqyrtimit Gjykata e Posaçme e Apelit e ndryshoi vendimin për ish-ministrin e Mjedisit, Lefter Koka duke e shpallur fajtor edhe për akuzën e shpërdorimit të detyrës siç kishte kërkuar SPAK dhe rritur me 1 vit burg dënimin.
Apeli i GJKKO në nëntor 2024, ndryshoi vendimin e 5 tetorit 2023, duke e dënuar përfundimisht ish-ministrin Lefter Koka me 10 vite burg, me gjykim të shkurtuar në 6 vite e 8 muaj burg. Edhe për Alqi Bllakon “Apeli” i Posaçëm e shpalli fajtor për shpërdorim detyre duke e dënuar me 4 vite burg, akuzë për të cilën shkalla e parë e kishte shpallur të pafajshëm. Për 7 të akuzuarit e tjerë biznesmenët Klodian Zoto dhe Stela Gugallja, në kërkim, dhe Pëllumb Abeshin, Jonida Zeqon, Bardhyl Çabirin e Serafin Papën nuk pati ndryshim të vendimit duke qëndruar në fuqi ai i shkallës së parë që u dha më 5 Tetor të vitit 2023.
