Policia e Shtetit ditën e djeshme ka bërë aksion për sa i përket gjobitjes së lokaleve pasi sipas njoftimit të uniformave blu janë ndëshkuar plot 20 subjekte me nga 1 milion lekë gjobë.
“Në të gjithë vendin janë ndëshkuar me masë administrative 1.000.000, 20 administratorë lokalesh, për mosrespektim të protokolleve të sigurisë dhe vendosje të muzikës pas orës 20:00 në ambientet e lokaleve”, thuhet në njoftimin e policisë.
Por, si gjithmonë policia e shtetit edhe me gjobat që vendos është selektive. Në momentin që shkohet për të gjobitur një subjekt fillimisht i kërkohet para nën dorë për të mos i gjobitur më pas nëse pronari nuk pranon ata bëjnë “rojën” deri sa ta kapin në shkelje dhe ta gjobisin.
Gjithashtu ajo që është problem akoma më i madh në këtë mes është edhe mos gjobitja fare e disa bizneseve, pasi është i njohuri i dikujt apo një tjetri.
Edhe pse qytetarët kanë pasur shumë vështirësi për shkak të pandemisë, policia e shtetit duket se është punësuar vetëm për të gjobitur për shkak të maskës apo muzikës, ndërkohë kriminelët e vërtetë bëjnë festë.
Gazeta Reforma ka publikuar edhe më parë skandale me gjobat e lokaleve.
Gjobat me urdhër të ministrit Lleshi
Aksionet spontane dhe të paorganizuara të Policisë së Shtetit për të mbyllur ose gjobitur lokale të caktuara, që mbajnë muzikë në ambientet e tyre, ose zhvillojnë aktivitet edhe pas orës 20:00 të darkës, janë dukuri e vazhdueshme në qytetet kryesore të vendit.
Policia e Shtetit duke përfituar edhe nga vakumi ligjor, mungesa e informacionit të subjekteve, por edhe nga qarkoret që lëshohen me pretekstin e koronavirusit, kryen gjobitje dhe bllokime selektive.
Janë të shumë mediat që kanë raportuar edhe kohët e fundit për aksione të tilla, por në një kohë që disa bare bllokohen, lokale nate apo pub-e vijojnë të pa shqetësuar edhe pas orës 24:00 aktivitetin.
Burime nga Policia e Shtetit i kanë thënë “GazetaReforma.com”, se shpesh “goditje të tilla për lokale të caktuara, apo edhe hotele, vijnë me urdhër direkt nga Drejtori i Përgjithshëm i Policisë së Shtetit, por që më parë merr miratimin nga vetë ministri Lleshaj”.
Sipas të njëtave burime, “gjobat për shkelje të aktit normativ që ndalon ushtrimin e aktivitetit të shoqëruar me muzikë pas orës 20:00 të mbrëmjes, valojnë nga 1 milion lekë e sipër për këtë shkelje, por më pas pronarët duhet të ‘kolliten’ për të mundur që të anulojnë aktet ose të mund të vijojnë aktivitetin”.
Burimet shtojnë se këto zarfe që jepen nga pronarë lokalesh, restorantesh dhe hotelesh, “shkojnë menjëherë shumë lartë, dhe vetëm thërrimet bien poshtë për shefat e komisariateve, që gjithsesi kërkojnë ‘racionin’ e tyre”.
Akti normativ absurd
Qeveria “Rama” dhe Ministria e Shëndetësisë, nxorën një akt normativ krejt absurd që po penalizon mjaftë subjekte, me pretekstin e parandalimit të përhapjes së Covid-19.
Akti Normativ Nr. 30, i datës 20.07.2020, neni 3, pika 7/2 thotë se: “Në çdo mjedis shërbimi ndalohet muzika pas orës 20:00”.
Janë shërbimet e Policisë në zonë ato që mandej marrin urdhër për të vepruar ose jo ndaj lokaleve të ndryshme, në rast të konstatimi të përdorimit të muzikës.
Në Tiranë, Durrës dhe Vlorë edhe kohët e fundit janë konstatuar dhe janë gjobitur subjekte të ndryshme për këtë çështje, por po në të njëjtat qytete në hotele, resorte dhe lokale të tjera muzika dhe jeta e natës vijon me frekuentim masiv dhe klientët e zgjedhur të qeverisë nuk shqetësohen.
Rast i ngjashëm është edhe ai i përmendur në mediat e ndryshme për subjektin “Folie Marine” në Jal, të cilit në asnjë rast nuk ju ndërpre as muzika dhe as jeta e natës, madje pa “distancim social”.
