Ish Prokurori i Përgjithshëm, Adriatik Llalla dy javë më parë u shpall fajtor dhe u dënua me dy vite burg .
Ditën e sotme njoftohet se policia i ka kthyer një përgjigje SPAK, ku i sqaron se janë bërë të gjitha kërkimet e nevojshme, por nuk e kanë gjetur ish-kryeprokurorin. Sipas News 24 kanë nisur procedurat për ta shpallur në kërkim ndërkombëtar ish-kryeprokurorin, Adriatik Llalla.
Sjellim në vëmendje se Llalla u largua jashtë vendit pak ditë para shpalljes së vendimit të gjykatës për ta dënuar atë me dy vite burg dhe për t’i konfiskuar pasurinë, ku menjëherë pas kësaj ai u shpall në kërkim kombëtar.
SPAK është i detyruar të nis procedurat për shpalljen në kërkim ndërkombëtar të Llallës, menjëherë pas marrjes së shkresës nga policia. Deri tani nuk rezulton të jetë bërë shpallja me kartelë të kuqe, por gjasat janë që brenda pak ditësh, emri i tij të futet në listën e të shpallurve në kërkim ndërkombëtar. Llalla rezulton të jetë jashtë vendit, pasi nga sistemi TIMS rezulton se ka dalë jashtë Shqipërisë dy javë para se të shpallej fajtor. Pasi efektivët e policisë shkuan në banesën e tij, nuk pati ndonjë komunikim për mediat, megjithatë pas kësaj ai është shpallur zyrtarisht në kërkim.
