Shteti dhe instancat tona janë të fortë me të voglin, dhe të butë me të madhin. Diçka të tillë e kanë treguar dhe sot.
Në një njoftim që vjen nga Policia e Durrësit, bëhet me dije se një 36-vjeçar, është arrestuar në flagrancë. Arsyeja e arrestimit është se ka tentuar të vjedhë një sasi nafte, nga pika e karburantit ku ai ishte i punësuar.
Më poshtë, dhe njoftimi i policisë…
NJOFTIMI NGA POLICIA
Durrës
Specialistët për Hetimin e Trafiqeve të Paligjshme dhe Narkotikëve arrestuan në flagrancë shtetasin:
R.B., 36 vjeç, banues në Durrës, pasi ka tentuar të vjedhë një sasi nafte në pikën e karburantit ku ai ishte i punësuar.
I vogël me të mëdhenjtë
Në këtë pikë jemi dakord, çdo vjedhje është e patolerueshme. Kush e shkel ligjin, duhet edhe të ndëshkohet përkatësisht me veprën penale që ka bërë.
Por, në Shqipëri ndodh që ata që vjedhin dhe janë në pikë të hallit – pavarësisht se nuk po e justifikojmë vjedhjen – kapen dhe dënohen. Nga ana tjetër, kompanitë që nxjerrin naftë, dhe ato që përpunojnë naftë, bëjnë evazione fiskale, nuk paguajnë detyrimet shtetërore, lënë edhe punëtorët pa paguar, dhe në fund të ditës, mbyllin punën duke u larguar nga Shqipëria.
Janë të regjistruara si kompani guackë në shtete që janë ‘parajsa fiskale’, dhe në të shumtën e rasteve pronarët e vërtetë nuk njihen. Kur zhyten në borxhe dhe detyrime të papaguara, mbyllin dyert dhe ikin, pa u futur asnjë në këmbë. Nuk arrestohen në flagrancë dhe pronarët e mëdhenj nuk japin llogari para ligjit, ndërsa lënë edhe qindra të tjerë pa paga dhe rroga.
Diçka e tillë duhet të marrë fund një herë e mirë, nëse duam që gjërat të funksionojnë…
/GazetaReforma.com/
