Më 28 mars 2021, sipërfaqja 4.7 hektarë pasuri shtetërore i kaloi në administrim Bashkisë Tepelenë; më 5 prill 2021, kryetari Tërmet Peçi ia dha me kontratë për 99 vite përdorim falas sallameri “Hako”, ndërsa shteti me fond 3.8 milionë Euro do t’i çojë ujin te resorti…
Mos u çuditni, por Muhamet Rrumbullaku me urdhër të Bablokut ka vënë dhjetëra forca policie të rendit, FNSH, Shqiponja e RENEA, në dispozicion të sallameri “Hako”, për t’i garantuar asaj, grabitjen e ujit të banorëve në fshatin Mezhgoran të Tepelenës.
Prej 1 jave, forcat e policisë dhe 20 kokë- rruajtur me çanta mbi barqe e kobure në brez, të paguar dhe dërguar si “cuba” nga pronari i sallameri “Hako”, Adnand Hako, po bëjnë terror me dhunë fizike e arrestime të banorëve të Mezhgoranit, që po mbrojnë ujin e banesave, tokave e bagëtive.
Fakti është ky: Me Vendim Nr. 17/5, datë 18 korrik 2022, kryeministri Edi Rama, i ka dhënë firmës së sallameri “Hako”, statusin “Investitor Strategjik” për ndërtimin e një resorti turistik, fermë derrash, bagëtish e vreshtash e punishte pijesh, me sipërfaqe totale 47 mijë e 400 m2 tokë e pyll pronë shteti falas në Peshtan të Tepelenës dhe 100 hektarë kullotë.
Më 28 mars 2021, këto sipërfaqe pasuri shtetërore i kaluan në administrim Bashkisë Tepelenë, ndërsa më 5 prill 2021, kryetari Tërmet Peçi ia dha me kontratë për 99 vite përdorim falas sallameri “Hako”-s, për ndërtimin e resortit dhe fermës agro-blegtorale “Zagroturizëm-Peshtan”.
Për resortin e fermën, pronari i sallamerisë Adnan Hako dhe ortakët e tij, kanë menduar dhe kanë vendosur të grabisin ujin e burimit malor të banorëve të fshatit Mezhgoran, megjithëse ky fshat dhe Peshtani ndahen në mes nga lumi Vjosë e janë shumë larg njeri-tjetrit.
Por kjo nuk e ka penguar Bablokun, që t’i akordojë një fond 3.8 milionë Euro Bashkisë së Tepelenës nëpërmjet FSHZH, për të ndërtuar një rrjet tubacioni, që do grabisë dhe çojë ujin e Mezhgoranit në Peshtan, duke ia hequr krejt ujin banorëve, tokave e bagëtive të Mezhgoranit.
Në dokumentet e këtij investimi shtetëror, thuhet se me fondin 3.8 milionë Euro, do bëhet rrjet ujësjellësi për banorët e zbritur në fushën e Sajmolës të Mezhgoranit, por realisht, uji do shkojë matanë Vjosës, vetëm te resorti dhe ferma private “Zagroturizëm-Peshtan” në Peshtan.
Po pse po e grabisin ujin e Mezhgoranit, kur resorti “Hako and Co” gjendet 80 metër larg Vjosës?
Sepse resorti turistik në Peshtan, me sipërfaqe 14 mijë e 400 m2 në mes të pyllit, larg rrugës nacionale e të ndarë nga lumi Vjosë, do jetë qytezë me vila druri, mjedise argëtimi, pishina të hapura në verë e të mbyllura gjatë dimrit, vetëm për vizitorë, turistë e pushues.
Duke qenë se Vjosa gjatë vjeshtës e dimrit dhe në ditë me shi është e turbullt, por shpesh edhe i ndotur nga derdhjet e ujërave të zeza e inertet, i vetmi ujë i pastër nga burime malore që ka ajo zonë, është uji i Mezhgoranit.
E përse të mos e marrin këtë ujë pronarët e resortit në Peshtan, kur rrjetin e tubacionit ua financon shteti, ndërsa grabitjen e realizojnë me forcat policore që Rrumbullaku me urdhër të Bablokut, i ka dërguar e dislokuar “non stop” me dajak ndaj banorëve të Mezhgoranit?
Fakti që ka qenë një projekt biznesi i paramenduar dhe i rënë në pazar me Bablokun, vërtetohet me këto akte: Firma e resort “Zagro” nga sallameri “Hako”, është krijuar më 29 qershor 2018 me adresë në Kashar, ndërsa më 5 maj 2020 e transferoi adresën qëndrore në fshatin Peshtan.
Më 5 prill 2021, Tërmet Peçi i Bashkisë Tepelenë i dha 47 hektarë toka në përdorim falas për 99 vite në Peshtan; më 18 korrik 2022, Babloku e shpalli firmën sallameri “Hako” investitor strategjik për resort në këtë zonë, ndërsa 3 tetor 2023 e sot kësaj dite, me urdhër të Bablokut, janë vërsulur policinë për t’i garantuar grabitjen e ujit të fshatit Mezhgoran.
