Policia aksion në Fier, përfundon në pranga 42-vjeçari. Sekuestrohen 53 kg drogë

Ditën e sotme policia ka goditur një veprimtari kriminale në fushën e narkotikëve. Policia e Fierit në kuadër të operacionit të koduar “Vreshtas”, ka sekuestruar fara kanabis, lëndë narkotike kanabis, fidanë dhe një armë gjahu pa leje. Ndër të tjera policia njofton se në pranga ka rënë një 42-vjeçar me inicialet M.XH., 42 vjeç, banues në Cakran të Fierit. 42-vjeçarit iu sekuestruan 53kg drogë dhe mbi 2 mijë fara kanabis. Mësohet se materialet proceduriale i kanë kaluar Prokurorisë pranë Shkallës së parë Fier, për procedime të mëtejshme.
Njoftimi i plotë i Policisë Fier
Në kuadër të këtij operacioni, u arrestua në flagrancë shtetasi M. Xh., 42 vjeç, banues në Cakran. Arrestimi i këtij shtetasi u bë pasi gjatë kontrollit të ushtruar në territorin e banesës, u gjetën dhe sekuestruan në cilësinë e provës materiale 56.3 kg lëndë narkotike cannabis sativa, 2785 fara kanabisi, fidanë të dyshuar cannabis sativa të kultivuar në vazo lulesh, 1 armë gjahu karabinë, sende që shërbejnë për kultivimin e bimëve narkotike dhe 2 aparate celularë”, sqaron policia e Fierit.
Materialet proceduriale i kaluan Prokurorisë pranë Gjykatës së Shkallës së parë Fier për veprat penale “Prodhimi dhe shitja e narkotikëve”, “Trafikimi i lëndëve narkotike”, “Kultivimi i bimëve narkotike” dhe “Mbajtja pa leje e armëve të gjuetisë dhe sportive.