Një 22-vjeçar është arrestuar sot në zonën e Krastës, në qytetin e Krujës. Operacioni policor i koduar “Krasta” çoi në prangosjen e Shkëlzen Allushit, i akuzuar për kultivim të bimëve narkotike të llojit cannabis sativa në një sipërfaqe të pyllëzuar.
Në të njëjtin operacion është proceduar në gjendje të lirë edhe shtetasi me inicialet M.B., 18 vjeç, i përfshirë në të njëjtën veprimtari.
Policia ka sekuestruar si provë materiale automjetin e 22-vjeçarit, i cili dyshohet se përdorej për të shkuar në parcelën e mbjellë me fidanë kanabisi.
NJOFTIMI I POLICISË:
“Shërbimet e Komisariatit të Policisë Krujë, në vijim të punës për parandalimin, evidentimin dhe goditjen e veprimtarisë kriminale në fushën e kultivimit të bimëve narkotike, gjatë kontrollit masiv të territorit, bazuar dhe në informacionet e marra në rrugë operative, kanë parandaluar dhe goditur një rast të tentativës për kultivim të kanabisit.
Në kuadër të operacionit “Krasta”, arrestuan shtetasin Sh. A., 22 vjeç dhe proceduan në gjendje të lirë shtetasin M. B., 18 vjeç, të dy banues në fshatin Halil, Fushë-Krujë. Këta shtetas, dyshohet se në bashkëpunim me njëri-tjetrin, kanë kultivuar bimë narkotike cannabis sativa në një hapësirë të pyllëzuar, në fshatin Krastë.
Gjithashtu,në vijim të veprimeve proceduriale u sekuestrua në cilësinë e provës materiale edhe automjeti në pronësi të 22-vjeçarit, i cili e përdorte për të shkuar tek vendi ku kishte kultivuar fidanë narkotikë. Materialet procedurale iu referuan Prokurorisë, për veprime të mëtejshme.”
