Nuk është dhënë masa e sigurisë ndaj policit që vrau Klodian Rashën. Ndërkohë mësohet se akuza zyrtare e ngritur ndaj policit Nevaldo Hajdëraj është vrasje në “kapërcimin e mbrojtjes së nevojshme”. Burime pranë gjykatës thonë se ka qenë vetë prokurori që ka kërkuar ta shtyjë në kufijtë e 72 orëshit seancën për masën e sigurisë, sepse nuk është përgatitur. Me sa duket nuk janë provat në favor të kësaj akuze të butë, e cila mund të rrëzohet me lehtësi nga gjykata dhe të kërkohet ndryshimi në një akuzë më të rëndë. Në këto kushte, seanca gjyqësore për efektivin Nevaldo Hajdëraj, që vrau 25-vjeçarin Klodian Rasha, është shtyrë për ditën e nesërme.
Sipas verisionit zyrtar, punonjësi i policisë Nevaldo Hajdëraj i kishte kërkuar Klodian Rashës që të ndalonte, por ai nuk ishte bindur duke vrapuar dhe në tentativë për t’i ikur policit, është qëlluar me armë zjarri.
Sipas ekspertizës paraprake, 25-vjeçari është qëlluar me armë zjarri dy herë. Ai është qëlluar njëherë me një plumb në shpatull dhe i ka prekur zemrën.
Vdekja e Klodian Rashës, është shënuar në orën 01:23 minuta dhe ka mbërritur i pajetë në spital. Të gjithë juristët kanë hedhur poshtë versionin e policisë të vetëmbrojtjes. Kreu u Avokatëve Penalistë, Saimir Vishaj u shpreh mbrëmë se kjo vrasje nuk është për vetëmbrojtje, sepse goditja është nga prapa.
/GazetaReforma.com/
