Për të dytin vit me radhë, brigjet e liqenit të Pogradecit janë shndërruar në një hapësirë të gjallë sportive, falë një nisme vullnetare të ndërmarrë nga ish-kampionët e notit Sotiraq Iftica dhe Vladimir Mato.
Dy sportistët kanë ngritur pishina të hapura në liqen dhe ofrojnë trajnime për fëmijët dhe të rinjtë, duke u përpjekur të kultivojnë dashurinë për notin dhe sportet ujore.
Risia e këtij sezoni është rikthimi i “water polo” apo futbollit në ujë, një disiplinë e harruar prej dekadash në Shqipëri.
Këtë verë është hedhur hapi i parë drejt formimit të një ekipi të strukturuar, me stërvitje intensive në ujërat e liqenit gjatë gjithë sezonit.
Një nga figurat historike të sporteve ujore në qytet, Llazi Kërxhalli, dikur pjesë e ekipit legjendar “Ylli i Kuq” është rikthyer simbolikisht për të përkrahur iniciativën.
Ai kujton me nostalgji fillimet e këtij sporti në Pogradec dhe vlerëson përpjekjet e brezit të ri për ta ringjallur këtë traditë.
Aktivitetet pritet të kulmojnë këtë muaj me disa gara të hapura, ku do të marrin pjesë si notarë amatorë, ashtu edhe profesionistë nga Shqipëria dhe rajoni.
Kulmi do të jetë maratona “Agron Ruvina”, një ngjarje simbolike që mban emrin e një prej figurave më të shquara të sportit në qytet.
Ky aktivitet jo vetëm që nderon trashëgiminë lokale, por shërben edhe si një nxitje për të rinjtë që të afrohen me sportin dhe jetën aktive.
