Një çift është përplasur nga një makinë këtë të martë në aksin e vjetër Vlorë-Novoselë, në afërsi të fshatit Bestovë, ku për pasojë ka humbur jetën 1 person dhe një ka ngelur i plagosur rëndë. Çifti mësohet se ishin turistë të ardhur nga Franca dhe po udhetonin me biçikleta kur janë përplasur nga makina. Sipas autoriteteve makina ka pasur drejtues shtetasin Kristi Dano, 24 vjeç. Sipas burimeve spitalore gruaja ka ndërruar jetë rrugës për në spital ndërsa edhe bashkëshorti ndodhet në gjendje të rëndë.Ende nuk dihet shkaku i aksidentit ndërsa policia ndodhet në vendin e ngjarjes për zbardhjen e rrethanave në të cilat ka ndodhur aksidenti i rëndë.
Njoftimi i policisë së shtetit:
Vlorë/Informacion paraprak
Rreth orës 15:20, në aksin rrugor Bestrov-Vlorë, automjeti me drejtues shtetasin K. D., 24 vjeç, banues në fshatin Oshtimë, Vlorë, ka aksidentuar 2 shtetas francezë (bashkëshortë), që udhëtonin me 2 biçikleta.
Si pasojë e aksidentit ka ndërruar jetë shtetasja franceze V. K., 51 vjeçe, ndërsa bashkëshorti i saj shtetasi F. M., 47 vjeç, ndodhet në spitalin e Vlorës, nën kujdesin e mjekëve.
Drejtuesi i automjetit, shtetasi K. D., u shoqërua në Komisariat, për veprime të mëtejshme.
Në vendngjarje ndodhet grupi hetimor, i cili po punon për sqarimin e plotë të rrethanave të aksidentit.
