Në qytetin e Korçës vijojnë arrestimet në fushën e dhënies së ndihmës ndaj shtetasve të huaj për kalim të paligjshëm të kufirit kundrejt fitimit.
Së fundmi, janë arrestuar 9 shtetas dhe 1 tjetër është shpallur në kërkim, pasi u kapën në flagrancë teksa transportonin 27 kladestinë.
Personi që është shpallur në kërkim, nuk iu bind urdhërit të bluve për ndalim, duke bërë manovra me automjet e duke aksidentuar 2 shtetas të huaj.
Sipas njoftimit zyrtar nga Policia e Korçës, të prangosurit janë kapur në tre vende të ndryshme, të ndarë në grupe për kalimin e klandestinëve jashtë Shqipërisë me anë të makinave.
Inicialet e personave, së bashku me informacionet e tjera rreth tyre janë si më poshtë:
• K. P., 21 vjeç; L. B., 20 vjeç; F. D., 19 vjeçe, si edhe u shpall në kërkim shtetasi K.D., 21 vjeç, banues në Durrës – u kapën në Çiflig, të Korçës duke transportuar për në Tiranë 4 shtetas të huaj.
• L. C., 35 vjeç, banues në Prishtinë; N. K., 43 vjeç, banues në Vushtrri, Kosovë; R. K., 29 vjeç, banues në Fushë-Kosovë – u kapën në Maliq, duke transportuar jashtë kufijve të Shqipërisë 4 klandestinë.
• Si edhe K. M., 21 vjeç; K. L., 19 vjeç dhe K. M., 21 vjeç, të tre banues në Tiranë- u arrestuan në Pogradec me dy automjete me 19 persona të huaj të cilët po transportoheshin në Tiranë.
Materialet në ngarkim të tyre i kaluan Prokurorisë pranë Gjykatës së Shkallës së Parë Korçë për veprat penale “Ndihma për kalim të paligjshëm të kufijve, kryer në bashkëpunim”, “Mosbindja ndaj urdhrit të punonjësit të policisë së rendit publik” dhe “Shkelja e rregullave të qarkullimit rrugor”.
Kujtojmë se mbrëmjen e djeshme një automjet, i drejtuar nga një vajzë, ka dalë nga rruga, duke përfunduar në një arë.
Ajo po transportonte disa refugjatë sirianë, por kur u pikas nga policia humbi kontrollin e mjetit duke dalë nga rruga.
Po transportonte disa refugjatë! Shoferja nuk i bindet policisë, përfundon me makinë të përmbysur
