Policia e Tiranës ka prangosur një 35-vjeçar pasi gjatë një kontrolli në makinën ku ai udhëtonte si pasagjer, u gjet një sasi lënde narkotike. I dyshuari në momentin e kontrollit është prezantuar si punonjës policie, ndërkohë që ka nxjerrë nga portofoli dhe një stemë policie. Mësohet se bashkë me të është arrestuar dhe drejtuesja e mjetit, si dhe është proceduar një vajzë tjetër që ishte pasagjere në momentin e ndalimit nga policia. Nuk bëhet ende e ditur sasia e drogës së gjetur në makinë.
Njoftimi i policisë:
U prezantua si punonjës policie, vihet në pranga 35-vjeçari. Vihet në pranga edhe drejtuesja e mjetit me të cilin udhëtonte ky shtetas, pasi iu gjet një sasi lënde narkotike kokainë.
Specialistët për Hetimin e Narkotikëve bënë arrestimin në flagrancë të shtetasve:
F.L., 35 vjeç, për veprat penale “Mbajtja pa të drejtë e uniformës” dhe “Moskallëzimi i krimit”; G. T., 24 vjeçe, për veprën penale “Prodhimi dhe shitja e narkotikëve”.
Këta shtetas janë konstatuar nga shërbimet e Policisë, në rrugën “Ali Demi”, dhe gjatë kontrollit në mjetin që drejtonte shtetasja G. T., është gjetur dhe sekuestruar një sasi lënde narkotike e llojit kokainë, ndërsa shtetasi F. L. është prezantuar si punonjës policie, duke paraqitur një portofol me stemën e Policisë.
Gjithashtu, nga specialisët për Hetimin e Narkotikëve u procedua penalisht shtetasja I. T., pasagjere në mjet, për veprën penale “Moskallëzimi i krimit”.
Materialet procedurale i kaluan Prokurorisë pranë Gjykatës së Shkallës së Parë Tiranë, për veprime të mëtejshme.
