Ditën e sotme, gjatë një konferencë për shtyp, ministrja e Turizmit Mirela Kumbaro vuri theksin tek taksa e fjetjes. Ministrja u shpreh se qeveria po shqyrton një sistem reformimi që lidhet me këtë taksë, e cila duhet të paguhet nga hotelet dhe strukturat akomoduese për çdo turist.
Mirela Kumbaro, theksoi pas mbledhjes së qeverisë se deklarimi dhe administrimi i kësaj takse do të digjitalizohet.Kjo taksë varion nga 35 lekë në 350 lekë për një natë qëndrimi, në varësi të kategorisë së bashkisë.
Kumbaro theksoi se me sistemin e reformimit, policia, qeverisja vendore dhe Tatimet do të jetë më të koordinuar për sigurinë e turistëve dhe për vjeljen e taksave.
“Taksa e fjetjes është një taksë që të gjithë hotelet dhe strukturat akomoduese duhet t’ja paguajnë bashkive, njësive të qeverisjes vendore për çdo turist që kalon një natë në territorin e asaj bashkie, në këto struktura. Edhe këtu jemi duke parë një sistem reformimi, për ta formalizuar, për ta bërë më transparent, për ta digjitalizuar që të jetë i kontrollueshëm qoftë nga Policia e Shtetit për arsye sigurie, qoftë nga njësitë e qeverisjes vendore për të vjel këtë taksë, qoftë nga Tatimet për të qenë të koordinuar”, u shpreh ministrja Kumbaro.
