Javës që kaloi, një nga bizneset e këngëtarit Noizyu përfshi nga flakët teksa u bë e ditur se i dyshuari kryesor për këtë akt të përsëritur është i afërmi i tij Eraldo Musteqja. Ai u kap në zonën e Currilave nga punonjësit e policisë, pak pas rënies së zjarrit dhe ka bërë rezistencë ndaj tyre. Në momentin e arrestimit atij iu sekuestrua edhe një thikë. Ndërkohë që pas arrestimit të tij gjykata e Durrësit e ka lënë në burg kushëririn e Noizy-t, Eraldo Musteqjan. Ndaj 26-vjeçarit prokuroria e Durrësit ka ngritur dy akuza, atë të shkatërrimit të pronës me zjarr dhe kundërshtimit të punonjësit të policisë së rendit publik.
Po ashtu ai akuzohet se është autori i dyshuar i vendosjes së zjarrit në lokalin e këngëtarit në Currila të Durrësit mëngjesin e 29 qershorit. Nga ana tjetër, Eraldo Musteqja është ankuar se policia e keqtrajtoi gjatë arrestimit në flagrancë. Në sallën e gjyqit, 26-vjeçari nuk ka pohuar, as ka mohuar akuzën për zjarrvënie, ndërsa ka deklaruar se ka reaguar pasi policët kanë ushtruar dhunë ndaj tij.
Në bazë të dëshmisë së tij ai ka qenë në zonë pranë lokalit për të medituar dhe ka qenë duke u larguar nga aty, kur është përballur me policinë. Përveç zjarrit të 29 qershorit, Musteqja dyshohet se është autor dhe i dy zjarrvënieve të tjera, njëra më 11 qershor në të njëjtin lokal i cili u shkrumbua thuajse plotësisht dhe më 10 qershor në derën e shtëpisë së familjes së këngëtarit.
Ndërkohë që pas ngjarjes, ishte vetë reperi Noizy që i ‘vuri gishtin’ të dyshuarit kryesor, duke thënë se familja e tij e ka rritur Eraldon, por ai më pas u bë besimtar ekstremist dhe është kundër alkolit dhe muzikës që luhet në lokal Sipas tij, ky është shkaku i konfliktit mes tyre që çoi në akte ekstreme 26-vjeçarin. Këto mbështeten dhe nga komunikimet mes palëve me mesazhe, ku Musteqja i kërkon të heqë dorë nga droga dhe alkooli, ndërsa i kërkon dhe të shlyejë detyrimin ndaj tij. Një detyrim për të cilin ai nuk ka dhënë shpjegime të tjera deri në këtë fazë të hetimit.
Para gjyqtares së seancës 26-vjeçari dhe mbrojtja e tij kanë kërkuar lirimin, ndërsa prokurori i çështjes lënien e tij “arrest në burg”. Pasi ka dëgjuar palët, gjykata e ka vlerësuar të ligjshëm arrestin dhe e la në burg pa afat të riun deri në përfundim të hetimeve. Ndërkohë në cilësinë e provës materiale janë sekuestruar edhe pamje të kamerave të sigurisë ku shfaqet rezistenca e tij ndaj efektivëve të policisë në çastin e arrestimit.
