Kombëtarja jonë po fillon të bëhet gati për ndeshjet e radhës që do të luhen në muajin nëntor.
Ndeshja e parë e kuqezinjve do të jetë më 11 nëntor në përballjen miqësore ndaj Kosovës e cila do të luhet në “Elbasan Arena”. Menjëherë pas kësaj ndeshje ata do të luajnë me 15 dhe 18 të këtij muaji ndaj Kazakistanit dhe Bjellorusisë.
Por në këto ndeshje kaq të rëndësishme për kualifikueset e Ligës së Kombeve, Kombëtares tonë do t’i mungojë mesfushori nga Fieri, Odise Roshi.Pas dëmtimit të pësuar ndaj Lituanisë, në ndeshjen kur u rikthye në Rusi, Roshi ka pësuar një goditje në kaviljen e majtë.
Pak kohë më parë të njëjtin dëmtim pati dhe sulmuesi Eros Grezda i cili iu nënshtrua një operacioni që e mbajti për disa muaj larg fushës së blertë. Roshi mungoi në ndeshjen e kësaj fundjave për Akhmat Groznin dhe për fat të keq konsiderohet mungesë e sigurt edhe për Kombëtaren në grumbullimin e nëntorit. Ende nuk dihet sesi është gjendja e tij shëndetësore dhe a do t’i nënshtrohet operacionit apo jo por një mungesë e tillë për dy ndeshje kaq të rëndësishme do të jetë një minus i madh për teknikun e kuqezinjve, Edi Reja.
Jashtë këtyre ndeshjeve të rëndesishme do të jenë dhe lojtarët Kastriot Dermaku dhe Keidi Bare të cilët janë gjithashtu të dëmtuar dhe nuk mund të rikthehen në fushë.
Ndërkohë kujtojmë se koronavirsui është rikthyer me shifra alarmante në gjithë botën dhe pjesa me e madhe e lojtarëve të Kombëtares tonë luajnë jashtë vendit dhe për shkak të masave kufizuese që shumë shtete po marrin rrezikohet të kemi dhe mungesa të tjera shumë të rëndësishme.Përmendim këtu dy mesfushorët Klaus Gjasula dhe Ylber Ramadani të cilët për shkak të këtyre masave rrezikojnë të mos jenë të gatshëm për të udhëtuar drejt Shqipërisë për ndeshjet e Ligës së Kombeve, por edhe pëballjen miqësore me Kosovën.
Ndaj, trajneri Reja do të duhet të bëjë llogaritë me shumë kujdes dhe pa lojtarët më të rëndësishëm të këtij reparti, i cili është shumë i rëndësishëm për lojën e kuqezinjve.
Me kaq shumë mungesa, një lojë e mirë dhe e frytshme me pikë do të jetë e vështirë për djemtë e Rejës, të cilët edhe në dy ndeshjet e mëparshme gjatë muajit tetor përballë Kazakistanit dhe Lituanisë nuk shënuan dot asnjë gol dhe duke i dhënë Kombëtares vetëm dy pikë të vlefshme për kualifikueset e Ligës së Kombeve.
